यवतमाळ ः यवतमाळ जिल्ह्यातील राळेगाव विधानसभा मतदारसंघात सध्या मोठ्या राजकीय हालचाली सुरू आहेत. अजित पवार यांनी माजी मंत्री व काँग्रेसचे नेते वसंत पुरके यांचा अख्खा मतदारसंघच रिकामा करण्याचे ठरवले आहे. येत्या ३० ऑक्टोबरला काँग्रेसचे सुमारे अडीचशे ते तीनशे पदाधिकारी व कार्यकर्ते राष्ट्रवादी काँग्रेसमध्ये प्रवेश करणार आहे. विशेष म्हणजे यापैकी सर्वाधिक कार्यकर्ते माजी मंत्री, काँग्रेसचे नेते माणिकराव ठाकरे यांचे समर्थक आहे. राष्ट्रवादी काँग्रेसमध्ये जाणाऱ्यांमध्ये जिल्हा परिषद, पंचायत समितीचे माजी अध्यक्ष, उपाध्यक्ष, नगरसेवक आणि सहकार क्षेत्रातील कार्यकर्त्यांचा अधिक भरणा आहे.
विधानसभेच्या निवडणुकीपासूनच काँग्रेसमधील दुसऱ्या फळीतील कार्यकर्त्यांमध्ये धुसफूस सुरू आहे. तिकीट वाटपाची वेळ येते तेव्हा काँग्रेसला फक्त वसंत पुरके, माणिकराव ठाकरे, शिवाजीराव मोघे यांच्याच घराण्याची आठवण येते. दुसऱ्यांचा विचारच केला जात नाही. वारंवार पराभूत झाल्यानंतरही त्यांनाच तिकिट का दिले जाते असा प्रश्न युवा कार्यकर्त्यांचा आहे.
सहकार क्षेत्रात मोठे नाव असलेले प्रवीण देशमुख, माणिकराव ठाकरे यांचे कट्टर समर्थक अरुण राऊत, जिल्हा परिषदेचे माजी अध्यक्ष अशोक धावळकर, बाबुपाटील वानखेडे हे सर्व नेते आणि पक्षाच्या धोरणाला कंटाळून काँग्रेसला सोडचिठ्ठी देत आहेत. त्यांच्यासोबत सहकार क्षेत्र, माजी नगर पालिका, झेडपी सदस्यांचा समावेश आहे. त्त्यामुळे तळागाळात काम करणारेच सोडून जात असल्याने आगामी स्थानिक स्वराज्य संस्थांचया निवडणुकीत काँग्रेसला मोठा धक्का बसणार आहे. यवतमाळमध्ये शिवसेना आणि काँग्रेस या दोनच पक्षाचा मोठा जनाधार आहे. तो यामुळे निम्मा होणार आहे.
काँग्रेसचे नेते वसंत पुरके आणि आमदार बाळासाहेब मांगुळकर यांनी प्रवीण देशमुख व त्यांच्या टीमने विधानसभेच्या निवडणुकीत पक्षाचे काम केले नाही अशी तक्रार केली होती. त्यांना पक्षातून काढूण टाकण्याचीही मागणी केली होती. या निवडणुकीत मांगुळकर वगळता माणिकराव ठाकरे आणि वसंत पुरके यांचा पराभव झाला.
राळेगाव मतदारसंघात पुरके आणि देशमुख यांचे परंपरागत राजकीय वैर आहे. देशमुख यांचे कार्यक्षेत्र कळंब आहे. या भागात पुरके यांना सर्वाधिक मते मिळाली आहेत. देशमुख यांच्या टीमने मोघे, माणिकराव ठाकरे आणि शेजारच्या यशोमती ठाकूर यांच्या मतदारसंघात काम केले असाही त्यांच्यावर आरोप आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.