Former Congress MLA joins NCP : ‘काँग्रेसचा परींदा‘ करणार अजितदादांच्या राष्ट्रवादीत प्रवेश; तारीखही ठरली

Buldhana News : ‘जब तक जिंदा हु तब तक काँग्रेस का परींदा हु‘ असा दावा करणारे, माजी मुख्यमंत्री विलासराव देशमुख यांचे विश्वासू, काँग्रेसचे माजी आमदार दिलीपकुमार सानंदा यांचा अजित दादांच्या राष्ट्रवादी काँग्रेसमध्ये जाण्याचा अखेर मुहूर्त ठरला आहे. 13 जूनला उपमुख्यमंत्री अजित पवार यांच्या उपस्थितीत ते खामगाव येथे प्रवेश करणार आहेत.

सानंदा हे खामगाव विधानसभा मतदारसंघात सलग 15 वर्ष आमदार होते. गेल्या काही वर्षांपासून त्यांची काँग्रेसमध्ये (Congress) घुसमट सुरू होती. गेल्या सहा महिन्यांपासून त्यांनी विविध पक्षांच्या नेत्यांच्या गाठीभेटी घेणे सुरू केले होते. यात मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, केंद्रीयमंत्री राजनाथ सिंग यांचा समावेश होता. त्यामुळे ते नेमक्या कुठल्या पक्षात जाणार याबाबत संभ्रम निर्माण झाला होता.

एप्रिल महिन्यात खामगाव कृषी उत्पन्न बाजार समिती सभापती व चार संचालक या सानंदा समर्थकांनी मुंबई येथे अजित पवार यांच्या उपस्थितीत राष्ट्रवादीमध्ये प्रवेश केला होता. या समारंभाला सानंदा उपस्थित होते. तेव्हाच सानंदा यांनी राष्ट्रवादी काँग्रेसमध्ये जाणार असल्याचे ठरवले होते. मात्र, त्यांचे समर्थकांनी यास नकार देत होते. माजी मंत्री डॉ. राजेंद्र शिंगणे विधानसभेपूर्वी अजितदादांना सोडून परत शरद पवारांकडे गेले होते. मात्र ते पराभूत झाले.

दिलीपकुमार सानंदा यांनी अगोदर भाजप (BJP) व शिवसेना पक्षाची चाचपणी केली होती, अशी माहिती आहे. मात्र, भाजपमध्ये आधीच अनेक नेते आहेत. येथे संधी मिळणे अवघड असल्याचे बघून त्यांनी राष्ट्रवादीची घड्याळ हाताला बांधण्याचा निर्णय घेतला आहे.

खामगाव येथे 13 जून रोजी पक्षप्रवेशाचा सोहळा होणार असून यावेळी जाहीर सभा आणि शक्ती प्रदर्शन केले जाणार आहे. त्यासाठी डॉ. बाबासाहेब आंबेडकर नगर परिषद मैदान बुक करण्यात आले आहे. राष्ट्रवादी काँग्रेसचे चिन्ह घड्याळ असलेल्या 5 हजार छत्र्या व 20 हजार घड्याळ, 10 हजार झेंडे, टी-शर्टची देखील ऑर्डर देण्यात आल्याची माहिती सूत्रांनी दिली.