Bacchu Kadu Vs Krishna Khopde : अहो खोपडे, तुम्हाला काय खोपडी आहे का?: बच्चू कडू एवढे का संतापले

Nagpur, 10 January : पूर्व नागपूर विधानसभा मतदारसंघ हा भाजपचे आमदार कृष्णा खोपडे यांचा बालेकिल्ला म्हणून ओळखला जातो. त्यांच्‍या मतदारसंघात भाजपच्या तीन कार्यकर्त्यांनी बंडाचे निशान फडकावले आहे. हे तीनही उमेदवार बच्चू कडू यांच्या प्रहार जनशक्ती पक्षाकडून महापालिकेची निवडणूक लढवत आहेत. आमदार खोपडे हे आपल्याला धमक्या देत आहेत, अशी तक्रार उमेदवारांनी केली असून कडू यांनी त्याचा शेलक्या शब्दांत समाचार घेतला.

मी शेतकऱ्यांच्या कर्जमाफीसाठी सरकारचे नाक दाबून तोंड उघडले, धमक्यांचे प्रकार मी खपवून घेणार नाही. अहो खोपडे, तुम्हाला खोपडी असेल तर माझ्यासमोर या, असे चॅलेंज माजी आमदार बच्चू कडू (Bacchu Kadu) यांनी दिले आहे. यावरून आता पुन्हा वाद होण्याची शक्यता वर्तविली जात आहे.

बच्चू कडू म्हणाले, सरकारने विधानसभेच्या निवडणुकीपूर्वी (Assembly Election) शेतकऱ्यांना कर्जमाफी देण्याचे आश्वासन दिले होते. वर्षभर नुसती चालढकल सुरू होती. योग्य वेळी सातबारा कोरा करू, असे सांगितले जात होते. त्यामुळे आम्ही सरकारचे नाक दाबले, त्यामुळे त्यांना तोंड उघडावे लागले. कर्जमाफीची तारीख जाहीर करावी लागली.

राजकारणात पदावर असो वा नसो, कामे थांबत नाहीत. मी आमदार नाही, तरीही शेतकऱ्यांची कर्जमाफी करून दाखवली, हे सरकारने व आमदार खोपडे यांनी लक्षात ठेवावे. त्यांच्या पक्षाचे कार्यकर्ते प्रहारच्या वतीने रिंगणात उतरल्यामुळे आमदार खोपडे हे धमकी देत असून दबाव निर्माण करण्याचा प्रयत्न करीत आहेत. असे प्रकार चालणार नाहीत. आमदार खोपडे यांना खरोखरच खोपडी आहे का, असा सवालही कडू यांनी उपस्थित केला.

आमदार खोपडे यांनी कर्तव्यदक्ष अधिकारी तुकाराम मुंडे यांच्याविरोधात तक्रार केली होती. दिव्यांग सचिव म्हणून नियुक्तीनंतर मुंडे यांनी बोगस दिव्यांग प्रकरणे उघडकीस आणली. त्यांच्याविरोधात कटकारस्थान रचण्यात आले, मात्र अखेर सत्याचाच विजय झाला.

कोणावरही दबाव टाकू नये. कुणी धमकावत असेल तर मला सांगा, मी व्यवस्था करून घेईन. जनतेची कामे करणे हेच लोकप्रतिनिधींचे कर्तव्य आहे, असे आवाहन करत कडू यांनी आजच्या राजकारण्यांवर जोरदार टीका केली.