Mahayuti internal conflict : महायुतीमधील धुसफूस शिगेला! मुनगंटीवार, झिरवाळ, बडोले यांची नाराजी चव्हाट्यावर!

Nagpur News : राज्यातील हिवाळी अधिवेशन सुरु होऊन सहा दिवस उलटले आहेत. विधिमंडळाच्या दोन्ही सभागृहाला विरोधी पक्षनेता निवडला जात नसल्याने विरोधी पक्ष नाराज आहेत. तर दुसरीकडे सत्ताधारी भाजप व अजित पवार यांच्या राष्ट्रवादी काँग्रेसमधील आमदार नाराज असल्याचे पुढे आले आहे. भाजपमधील माजी मंत्री सुधीर मुनगंटीवार व मंत्री नरहरी झिरवाळ यांच्यासह आमदार राजकुमार बडोले नाराज असल्याने महायुतीत धुसफूस शिगेला पोहचली आहे. या नाराज असलेल्या नेत्यामुळे येत्या काळात महायुतीला फटका बसण्याची शक्यता आहे. त्यामुळे ऐन हिवाळ्यातच नागपूरमधील वातावरण तापण्यास सुरुवात झाली आहे.

हिवाळी अधिवेशनकाळात प्रथमच राज्यातील महायुती सरकारवर विरोधी पक्षासह सत्तधारी पक्षातीलच नाराज आमदारांची समजूत काढावी लागत असल्याने वातावरण चांगलेच तापले आहे. भाजप (BJP) नेते सुधीर मुनगंटीवार आणि नरहरी झिरवाळ यांनी एफडीएच्या कामकाजावर शुक्रवारी जाहीर नाराजी व्यक्त केली. राष्ट्रवादी काँग्रेसचे आमदार राजकुमार बडोले यांनीही नाराजी बोलून दाखवली. त्यामुळे महायुतीमधील मतभेद चव्हाट्यावर आले आहेत.

बहुजन समाज,अनुसूचित जाती-जमाती व मागासवर्गीय समाजाच्या प्रश्नांना सभागृह कामकाजात स्थान दिले जात नसल्याने बडोले सरकारवर नाराज आहेत. त्यांनी विधानसभा अध्यक्ष राहुल नार्वेकर (Rahul narwekar) यांना पत्र लिहून आपली नाराजी व्यक्त केली आहे. कामकाजामध्ये सामाजिक न्याय विभाग, आदिवासी विकास विभाग, बहुजन कल्याण विभाग व दिव्यांग कल्याण विभाग यांच्याशी संबंधित कोणत्याही प्रश्नांना स्थान देण्यात आले नाही.

डॉ. बाबासाहेब आंबेडकर, महात्मा फुले व छत्रपती शाहू महाराजांनी शोषीत वंचित आणि बहुजन समाज हक्कांसाठी जे विचार मांडले त्यानुसार या समाजाशी निगडित प्रश्नांना सभागृहाच्या कामकाजात स्थान मिळणे अत्यावश्यक आहे. अनुसूचित जाती, अनुसूचित जमाती, इतर मागासवर्गीय आदिवासी व बहुजन समाज यांच्याशी संबंधित अनेक प्रश्न विविध आमदारांनी नियमानुसार दाखल केले असूनही त्या प्रश्नांना कामकाजात स्थान देण्यात आले नाही.

ही अतिशय गंभीर आणि चिंताजनक बाब असल्याचे माजी मंत्री व आमदार राजकुमार बडोले यांनी पत्रामध्ये म्हटले आहे. त्यामुळे ऐन अधिवेशन काळातच नाराजी उफाळून आली आहे. त्यामुळे आता येत्या काळात सत्ताधारी आमदारांची नाराजी दूर करण्यासाठी काय करणार याकडे सर्वांचे लक्ष लागले आहे.