Nagpur Firing : काँग्रेस नगरसेवकाच्या घरावर गोळीबार, मध्यरात्री मोठा आवाज आला अन्..., धक्कादायक व्हिडिओ आला समोर

Nagpur Congress Corporator Attacked : नागपूर शहरातून एक धक्कादायक बातमी समोर आली आहे. ती म्हणजे शहरातील प्रभाग क्रमांक २६ चे काँग्रेस नगरसेवक शुभम शेषराव मोटघरे यांच्या घरावर मध्यरात्री अज्ञात हल्लेखोरांनी गोळीबार केला आहे. वाठोडा परिसरातील श्रावणनगर येथील स्वामीनारायण मंदिराच्या मागे असलेल्या त्यांच्या घरावर गोळीबार करण्यात आला.

या घटनेत सुदैवाने कोणीही जखमी झाले नाही. मात्र, गोळी लागल्याने घराची काच फुटली आहे. मिळालेल्या प्राथमिक माहितीनुसार, रात्री साडेबारा वाजण्याच्या सुमारास दोन अज्ञात व्यक्ती दुचाकीवरून मोटघरे यांच्या घराजवळ आल्या. त्यापैकी एका व्यक्तीने चेहरा कपड्याने झाकलेला होता. दुचाकीवरून जात असतानाच त्याने मोटघरे यांच्या घराच्या दिशेने गोळी झाडली. त्यानंतर दोन्ही हल्लेखोर घटनास्थळावरून पसार झाले.

गोळीबाराच्या आवाजाने मोटघरे यांना जाग आली. घराची काच फुटल्याचे लक्षात आल्यानंतर त्यांनी घराबाहेरील CCTV फुटेज तपासले. त्यामध्ये दोन जण दुचाकीवरून येताना आणि त्यापैकी एकाने घराच्या दिशेने गोळीबार करताना दिसत आहे. घटनेची माहिती तातडीने पोलिसांना देण्यात आली.

माहिती मिळताच स्थानिक पोलिसांसह गुन्हे शाखेचे अधिकारी घटनास्थळी दाखल झाले. काँग्रेसचे आमदार विकास ठाकरे यांनीही मध्यरात्री मोटघरे यांच्या घरी भेट देऊन घटनेची माहिती घेतली. गोळीबार नेमका कोणत्या कारणातून झाला, हे अद्याप स्पष्ट झालेले नाही. वैयक्तिक वाद, राजकीय कारण किंवा अन्य कोणत्या कारणातून हा हल्ला करण्यात आला, याचा पोलीस तपास करत आहेत.

हल्लेखोरांची ओळख पटवण्यासाठी परिसरातील CCTV फुटेज पोलिसांनी ताब्यात घेतले असून, त्यांचा माग काढण्यासाठी तपास पथके कामाला लागली आहेत. दरम्यान, भरवस्तीत एका लोकप्रतिनिधीच्या घरावर झालेल्या गोळीबारामुळे नागपुरात खळबळ उडाली आहे. हल्लेखोर कोण आणि गोळीबारामागील नेमके कारण काय, याचा तपास आता पोलिसांकडून सुरू आहे.