Nagpur News: नागपूर महापालिकेची निवडणूक घोषित पण आरक्षणामुळं पुन्हा...; नेमकं काय घोळ झालाय?

Nagpur News: ओबीसी आणि एकूणच आरक्षणाने ५० टक्क्यांची मर्यादा ओलांडल्याने काही नगरपालिका आणि नगरपरिषदांच्या निवडणुका मतदानाच्या एक दिवस आधी पुढे ढकलण्यातच आला होत्या. त्यामुळे अभूतपूर्व गोंधळ उडाला होता. न्यायालयाने ५० टक्क्यांच्यावर आरक्षण नको असे स्पष्ट केले आहे, असे असतानाही नागपूर महापालिकेत एकूण आरक्षित जागांची संख्या ५४ टक्के असतानाही निवडणूक घेण्यात येत आहे. त्यामुळे कोणी कोर्टात गेल्यास पुन्हा एकदा निवडणूक पुढे ढकलण्याची वेळ येऊ शकते, अशी भीती वर्तविली जात आहे.

नागपूर महापालिकेत नगरसेवकांची संख्या एकूण १५१ इतकी आहे. निवडणूक आयोगाने आरक्षणाची सोडत यापूर्वीच जाहीर केली आहे. त्यानुसार ओबीसीच्या वाट्याला ४०, अनुसूचित जातील लोकसंख्येनुसार ३० आणि अनुसूचित जमाती (एसटी) १२ जागा सोडण्यात आला आहे. खुल्या प्रवर्गासाठी ५९ जागा शिल्लक ठेवण्यात आल्या आहेत. मात्र आरक्षणाची एकूण टक्केवारी ५४ इतकी आहे. नगर पालिकेच्या निवडणुकीच्या दरम्यान न्यायालयाने ५० टक्क्यांच्यावर आरक्षण जाता कामा नये असे बजावले होते. त्यानंतर निवडणूक आयोगाने यात सुधारणा केली नाही. नगर पालिका आणि नगर परिषदेच्या निवडणुकीवरून निवडणूक आयोगावर सर्वच पक्षांनी रोष व्यक्त केला होता. काँग्रेसचे नेते नाना पटोले यांनी हा घोळा मुद्दाम घातला असल्याची शंका व्यक्त करून निवडणूक आयुक्तांच्या विरोधात अभियोग आणावा अशी मागणी केली होती.

नुकत्याच आटोपलेल्या हिवाळी अधिवेशनात त्यांनी हा मुद्दा उपस्थित केला होता. मात्र, विधानसभेचे अध्यक्ष राहुल नार्वेकर यांनी निवडणूक आयुक्त आणि न्यायाधीश यांना निलंबित करण्याचे अधिकार राज्य शासनाला नसल्याचे सांगून पटोले यांची मागणी फेटाळून लावली होती. मुख्यमंत्री देवेंद्र फडणवीस यांनीसुद्धा असा घोळ आपण प्रथमच बघत असल्याची प्रतिक्रिया व्यक्त करून निवडणूक आयोगावर नाराजी व्यक्त केली होती. निवडणूक आयोगाने पुढे ढकलल्या नगरपालिकेची निवडणूक आता २० डिसेंबरला होणार आहे. उर्वरित पालिकेच्या निवडणूक २ डिसेंबरला आटोपली आहे.

न्यायालयाने पहिल्या आणि दुसऱ्या टप्प्यातील निवडणुकीच मतमोजण एकाच दिवशी घेण्याचे आदेश दिले आहे. त्यानुसार १४ डिसेंबरला नगर पालिका आणि नगर परिषदेची निवडणुकीची मतमोजणी होणार आहे. नगरपालिकेमध्ये ज्यामुळे घोळ झाला तोच घोळ महापालिकेच्या निवडणुकीत होण्याची शक्यता आरक्षणाची मर्यादा ओलांडल्याने होण्याची शक्यता वर्तविली जात आहे.