Ram Satpute : आमदार राम सातपुतेंना विधानसभा अध्यक्षांनी झापलं; अधिवेशनात नेमकं काय घडलं ?

Nagpur Winter Session 2023 : राज्यात सध्या दूध दरामध्ये वाढ करण्याच्या मागणीवरून शेतकरी आक्रमक झाला आहे. सोलापूर जिल्ह्यातही खासगी दूध खरेदी केंद्राकडे दुधाला अत्यल्प दर दिला जात आहे. यामुळे शेतकऱ्यांचे मोठ्या प्रमाणात आर्थिक नुकसान होत आहे. याच पार्श्वभूमी माळशिरस विधानसभा मतदारसंघाचे आमदार राम सातपुतेंनी मंगळवारी हिवाळी अधिवेशनामध्ये दूध दराच्या मुद्द्यावरून आक्रमक भूमिका घेतली. त्यांचा आक्रमकपणा अधिकच वाढल्याने विधानसभा अध्यक्ष राहुल नार्वेकरांनी आमदार सातपुतेंची चांगलीच कान उघडणी केल्याचा प्रकार घडला आहे.

विधिमंडळाच्या हिवाळी अधिवेशनाच्या चौथ्या दिवशी राम सातपुतेंनी माळशिरस तालुक्यासह सोलापूर जिल्ह्यातील दूध दराच्या प्रश्नावर आक्रमकपणे भूमिका मांडली. खासगी दूध खरेदी केंद्राकडून कोल्हापूर सांगली जिल्ह्यात दुधाला 34 ते 35 रुपये प्रतिलिटरचा दर दिला जात आहे. मात्र सोलापूरमधील शेतकऱ्यांना केवळ 26 रुपये दर मिळत आहे. येथील खासगी दूध संघाची 'मोनोपॉली' झाली आहे.

'आमचा दुग्ध उत्पादक शेतकरी हा पहाटे चार वाजल्यापासून काम करतो. गाईंची स्वच्छता सेवा करण्याचे काम करतो, दूध उत्पादन करतो. मात्र आज घडीला पशुखाद्याच्या किमतीमध्ये मोठ्या प्रमाणात वाढ झाली आहे. त्यामुळे दुग्ध उत्पादकांना लिटरला 26 रुपये खर्च येतो. परंतु या दूध खरेदी संघटनांच्या 'मोनोपॉलि'मुळे शेतकऱ्यांना केवळ 26 रुपयेच भाव मिळत आहे.' पाण्याच्या बाटलीच्या किमती इतका दर दुधाला मिळत असल्याकडेही सातपुतेंनी लक्ष वेधले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

सातपुते (Ram Satpute) यांनी सभागृहात सरकारला विनंती केली की, शेतकऱ्यांच्या दुधाचे दर वाढले पाहिजे, शेतकऱ्यांना 34 रुपये प्रतिलिटर हमी भाव मिळालाच पाहिजे, अशी मागणी सातपुतेंनी सरकारकडे केली. यावेळी आक्रमक झालेल्या आमदार सातपुतेंनी खासगी दूध संघाकडून शेतकऱ्यांची लुबाडणूक होत असल्याच्या मुद्द्याकडे लक्ष वेधत अडचणीत सापडेलल्या दुग्ध उत्पादक शेतकऱ्यांची वास्तव परिस्थिती कथन केली.

दरम्यान, दूध दराचा मुद्दा मांडत असताना राम सातपुते हे अधिकच आक्रमक झाले होते. दुधाला कोल्हापूर आणि सांगली जिल्ह्यात मिळणाऱ्या दराच्या तुलनेत सोलापूर जिल्ह्यातील दूध दर हा उत्पादन खर्चाइतकाच मिळत असल्याचे आमदार सातपुते हे पोटतिडकीने सभागृहाला ओरडून सांगण्याचा प्रयत्न करत होते.

सातपुतेंचा आक्रमकपणा पाहून विधानसभा अध्यक्ष राहुल नार्वेकर (Rahul Narwekar) यांनी, 'तुम्ही माहिती देताय की वॉर्निंग देताय ?', असा सवाल केला. तसेच सातपुतेंना बोलण्यापासून रोखत खाली बसण्यास सांगून पुढील सदस्यांना बोलण्याची संधी दिली. त्यामुळे सभागृहात राम सातपुते यांना दुधाच्या प्रश्नावर आपली भूमिका सविस्तरपणे मांडता आली नसल्याचेही दिसून आले.

(Edited by Sunil Dhumal)