Ahmedabad Air plane Crash: अहमदाबादच्या विमान अपघातात नागपूरच्या कामदार यांनी कुटंब गमावले, तिघांचा मृत्यू

Nagpur News : अहमदाबाद येथून लंडनला जाणारे एअर इंडियाचे विमान कोसळून गुरुवारी सर्व प्रवाशांचा मृत्यू झाला. त्यामुळे देशभर हळहळ व्यक्त केली जात आहे. तर या घटनेत आत्तापर्यंत एकूण 265 जणांचा मृत्यू झाल्याची धक्कादायक माहिती समोर येत आहे. या घटनेनंतर आता अनेक धक्कादायक बाबी समोर येत आहेत.

अहमदाबाद येथे एअर इंडियाच्या भीषण विमान दुर्घटनेत(Ahmedabad Air Plane Crash) 241 प्रवाशांचा मृत्यू झाला असून सुदैवाने 1 प्रवासी बचावला आहे. या विमानातून नागपुरातील कामदार कुटुंबातील यशा कामदार, त्यांचा दीड वर्षाचा मुलगा रुद्र आणि सासू रक्षा मोढा यासुद्धा प्रवास करीत होत्या. त्यांचाही यात मृत्यू झाला आहे. काही दिवसांपूर्वीच यशा नागपुरात माहेरी आल्या होत्या.

यशा कामदार यांचे वडील मनीष कामदार हे नागपुरातील क्वेटा कॉलनी परिसरातील हिंदुस्तान शाळेजवळ राहतात. त्यांचा ग्लोसाईन बोर्डचा व्यवसाय आहे. यशा कामदार यांचे पाच वर्षांपूर्वी अहमदाबाद येथील मोढा कुटुंबात लग्न झाले. त्यांना दीड वर्षाचा रुद्र हा मुलगा होता. दरम्यान, काही वर्षांपूर्वीच व्यवसाया निमित्त मोढा कुटुंब लंडनला स्थायिक झाले.

यशा यांच्या सासरे आजारी झाल्याने चार महिन्यांपूर्वीच अहमदाबाद येथे परतले होते. मात्र, उपचारादरम्यान त्यांचा मृत्यू झाला. त्यानंतर काही दिवसांसाठी यशा या नागपुरात वडिलांकडे आल्या होत्या. त्यानंतर लंडनला सासऱ्यांच्या शोकसभेसाठी त्यांना परत जायचे असल्याने त्यांनी अहमदाबाद गाठले होते.

आजच्या एअर इंडियाच्या विमानाने त्या लंडनला निघाल्या होत्या. त्यांच्यासोबत मुलगा रुद्र आणि सासू रक्षा होत्या. 35 - इ या सीटवर त्या स्वतः तर 35 - एफवर रक्षा मोढा आणि त्या पुढच्या सीटवर रुद्र बसला होता.

विमानाने टेक-ऑफ केल्यावर काहीच क्षणात विमान कोसळले आणि सर्वकाही संपले. ही बातमी कामदार कुटुंबीयांना मिळताच, संपूर्ण कुटुंबात शोककळा पसरली. दरम्यान, कामदार कुटुंबीय समृद्धी मार्गाने अहमदाबादकडे रवाना झाले.