Navneet Rana News: नवनीत राणांची भाजपमधून हकालपट्टी होणार? 'त्या' पत्रावर मंत्री बावनकुळेंनी घेतली अ‍ॅक्शन

Amravati News: महापालिकेच्या निवडणुकीचे निकाल लागताच भाजपमध्ये उफाळून आलेल्या असंतोषाचा भडका एका लेटरबॉम्बमुळे वरपर्यंत पोहोचला. त्यामुळे आता भाजपने एक टीम पाठवून अमरावतीची सत्यस्थिती जाणून घेण्याच्या हालचाली सुरु केल्या आहेत. विशेष म्हणजे, पराभवाची मीमांसा केली जाणार असून कारणांचा शोध घेण्यात येणार आहे.

2017 च्या निवडणुकीत भाजपने अमरावतीत 45 जागा जिंकून निर्विवाद बहुमत मिळवले होते. परंतु यावेळी भाजपला 25 चा आकडा गाठणेसुद्धा कठीण झाले होते. त्यामुळे पराभूत तसेच काही निवडून आलेल्या नगरसेवकांनी मुख्यमंत्र्यांकडे तक्रार करून या पराभवासाठी भाजपच्या नेत्या तसेच माजी खासदार नवनीत राणा (Navneet Rana) यांना दोषी ठरविले आहे.

नवनीत राणा यांच्यामुळेच आमचा पराभव झाल्याचा दावा या उमेदवारांनी पत्राच्या माध्यमातून केला आहे. त्यामुळे त्यांचे पक्षातून निष्काशन करण्याची मागणी सुद्धा मुख्यमंत्र्यांना पाठविण्यात आलेल्या पत्राच्या माध्यमातून करण्यात आली आहे. त्यामुळे शहरात चांगलीच खळबळ उडाली आहे.

याबाबत बोलताना महसूलमंत्री चंद्रशेखर बावनकुळे म्हणाले, अमरावती महापालिका निवडणुकीतील पराभवाचे सखोल विश्लेषण केले जाईल. पराभूत उमेदवारांकडून प्राप्त झालेल्या तक्रारींची गांभीर्याने दखल घेतली जाईल. कोणी पक्षविरोधी काम केले का, याची सखोल चौकशी केली जाईल. यासाठी विशेष चौकशी टीम पाठवण्यात येईल. संपूर्ण परिस्थितीचा अभ्यास करून पुढील निर्णय घेऊ.

त्याचवेळी भाजपचे शहर अध्यक्ष डॉ. नितीन धांडे यांनी नवनीत राणा यांच्याविरोधातील ते पत्र बनावट असल्याचे म्हंटले आहे. माझे १५ ते १८ लोकांशी बोलणे झाले आहे. काही लोकांनी ती त्यांची सहीच नसल्याचे सांगितले. तर काही लोकांनी आम्हाला वेगळे काहीतरी सांगून आमच्या सह्या घेण्यात आल्याचे म्हटले आहे. हा निंदनीय प्रकार आहे.

नेमके कोणत्या लोकांनी ही खोटी तक्रार केली, याची आम्ही शहानिशा करू. ज्यांनी हे कारस्थान केले त्यांच्या विरुद्ध पक्ष निश्चितच कारवाई करेल. ही पक्षाची बाब असल्याने त्याबाबत पक्षाच्या वरिष्ठ नेत्यांना सांगता आले असते, अशा पद्धतीने पत्र काढून ते माध्यमांकडे पाठविण्यामागे काय उद्देश होता, याचा शोध निश्चितच घेतला जाईल, असे डॉ. नितीन धांडे यांनी स्पष्ट केले.