संजय राऊत भडकले; म्हणाले, राजकीय सूडबुद्धीच्या कारवाईचं उत्तर द्यावं लागेल…

नागपूर : मुख्यमंत्री उद्धव ठाकरे यांच्या पत्नी रश्‍मी ठाकरेंचे भाऊ श्रीधर पाटणकर यांची ठाण्यातील मालमत्ता ईडीने आज जप्त केली. त्यानंतर महाराष्ट्राचे (Maharashtra) राजकारण ढवळून निघाले आहे. शिवसंपर्क अभियानासाठी नागपुरात आलेले शिवसेना नेते खासदार संजय राऊत या कारवाईने चांगलेच भडकले. केंद्र सरकारला या राजकीय सूडबुद्धीच्या कारवाईचं उत्तर द्यावं लागेल, असं ते म्हणाले.

गेल्या काही दिवसांपासून ईडी गैरवापर मोठ्या प्रमाणात वाढला आहे आणि आज श्रीधर पाटणकर यांच्यावर केलेल्या कारवाईनंतर महाविकास आघाडीतील नेते संतापले आहेत. पाटणकर हे केवळ उद्धव ठाकरे (Uddhav Thakeray)आणि रश्‍मी ठाकरे (Rashmi Thackeray) यांचे नातेवाईकच नाही, तर ते आम्हा सर्वांच्या कुटुंबातील सदस्याप्रमाणे आहेत. भाजप शासीत राज्यांमध्ये ईडीची कार्यालये बंद करून ठेवलेली आहेत आणि गैरभाजप सरकार असलेल्या राज्यांमध्येच ईडीने कारवायांचा धडाका लावला असल्याचा आरोप खासदार राऊत (Sanjay Raut) यांनी केला.

सद्यःस्थितीत देशातील न्यायालयेसुद्धा दबावात आहेत. यापूर्वी देशात असे कधी घडले नव्हते. चार राज्यांमध्ये तुम्ही जिंकले म्हणजे देशाचे मालक होत नाही. ही तर तानाशाहीची धोकादायक सुरूवात आहे. आम्हाला तुरुंगात टाकायचे असेल तर खुशाल टाका, आम्ही तयार आहोत. पण देशाचे स्वातंत्र आणि लोकशाही वाचवण्यासाठी आम्ही सतत लढा देत राहू. महाविकास आघाडी सरकारमधील स्तंभांना दबावात आणून तुम्हाला वाटत असेल की हे सरकार पडेल, राष्ट्रपती राजवट लागेल, तर झोपेतून जागे व्हा, कारण आम्ही लढणारे आहोत, असेही संजय राऊत म्हणाले.

युपीए सरकारच्या काळात फार फार तर २० ते २५ ईडीच्या कारवाया झाल्या असतील. पण भाजपच्या ७ वर्षाच्या सरकारच्या काळात दोन, अडीच हजाराच्या वर कारवाया ईडीने केल्या आहेत. यातील अनेक कारवाया या चुकीच्या पद्धतीने करण्यात आल्या आहेत. हे नंतर न्यायालयात स्पष्ट झालेले आहे. महाराष्ट्रात आपली सत्ता आली नाही म्हणून सत्ता खेचून घेण्यासाठी केंद्रीय तपास यंत्रणांचा अशा पद्धतीने गैरवापर करून प्रयत्न केले जात आहेत. पण त्यांचे हे प्रयत्न कदापि यशस्वी होणार नाहीत. ही हुकूमशाही महाराष्ट्र सहन करणार नाही, असेही संजय राऊत यांनी सांगितले.