Congress News: धक्क्यावर धक्के सहन केलेल्या काँग्रेससाठी मोठी दिलासादायक बातमी; दोन दिग्गज नेत्यांची 'घरवापसी'

Yavatmal News: आगामी स्थानिक स्वराज्य संस्थेच्या निवडणुकीपूर्वी राष्ट्रवादी काँग्रेस शरदचंद्र पवार पक्षाला दुसरा मोठा धक्का बसला आहे. जिल्हा परिषदेचे माजी अर्थ व बांधकाम सभापती निमीष मानकर, राष्ट्रवादी युवक काँग्रेसचे माजी जिल्हाध्यक्ष आशिष मानकर यांनी राष्ट्रवादीला सोडचिठ्ठी दिली आहे.

उद्या शनिवारी ते आपल्या समर्थकासह काँग्रेसमध्ये (Congress) प्रवेश करणार आहेत. विशेष म्हणजे कालच काँग्रेसचे दोन डझनापेक्षा अधिक कार्यकर्ते अजितदादांच्या राष्ट्रवादीत दाखल झाले आहेत. या दोघांच्या घर वापसीने काँग्रेसला थोडा दिलासा मिळाला आहे.

जिल्हा परिषद, पंचायत समिती तसेच नगरपालिका निवडणुका काही दिवसांवर आल्या आहेत. निवडणुकीपूर्वी सत्ताधारी पक्षात ’इनकमिंग’ सुरू आहे. दुसरीकडे राष्ट्रवादी काँग्रेस शरदचंद्र पवार पक्षातून ‘आउटगोइंग’थांबलेली नाही. त्यातच आता पांढरकवडा, राळेगाव तालुक्यात राष्ट्रवादी काँग्रेस शरदचंद्र पवार पक्षाला मोठी खिंडार पडणार आहे.

जिल्हा परिषदेचे माजी सभापती तसेच पांढरकवडा तालुक्यातील राष्ट्रवादी काँग्रेसचे (NCP) नेते निमीष मानकर यांनीसुद्धा राष्ट्रवादी काँग्रेसला सोडचिठ्ठी दिली आहे. त्यांनी काँग्रेसमध्ये जाण्याचा निर्णय घेतला आहे. यामुळे आगामी स्थानिक स्वराज्य संस्थेच्या निवडणुकीपूर्वी पांढरकवडा, राळेगाव तालुक्यात काँग्रेसला ‘अच्छे दिन’ आले आहे. या भागात पक्षाला बळ मिळणार असल्याची चर्चा सुरू आहे. मानकर यांची माजी खासदार उत्तमराव पाटील यांचे खंदे समर्थक म्हणून ओळख होती. दादा सोबत त्यांनी राष्ट्रवादी काँग्रेसमध्ये प्रवेश केला होता.

आता त्यांनी राष्ट्रवादीला रामराम ठोकला असून काँग्रेसमध्ये घरवापसी केली आहे. मानकर गटाचे मोहदा, करंजी, रुंझा यासह पांढरकवडा व राळेगाव तालुक्यातील भागात प्राबल्य आहे. सहकार क्षेत्रातही या गटाचे वर्चस्व आहे. जिल्हा परिषदेच्या गट आणि गणावर त्यांचा प्रभाव आहे. निवडणुकीपूर्वी राष्ट्रवादीसाठी हा मोठा धक्का मानला जात आहे.

यवतमाळ जिल्ह्यात सध्या मोठ्या राजकीय घडामोडी सुरू आहे. बंजारा समाजाचे नेते व काँग्रेसचे संघटन सचिव देवानंद पवार भाजपमध्ये दाखल झाले आहे. गुरुवारी सहकार क्षेत्रातील नितीन देशमुख यांच्यास जिल्हा परिषदेचे माजी उपाध्यक्ष, सभापती यांच्यासह आठ ते दहा माजी नगरसेवकांनी काँग्रेसला जय महाराष्ट्र केला.

या सर्वांचा रोष स्थानिक आजी-माजी आमदारांवर आहे. यवतमाळ जिल्ह्यात फक्त तीनच घराण्यात तिकीट दिले जाते. अनेकदा पराभूत झाल्यानंतर त्यांनाच का तिकीटा देतात असा येथील काँग्रेसच्या युवा नेत्यांचा सवाल होता.