अकोला : मुंबई महापालिकेत उद्धव आणि राज ठाकरे यांनी युती केली आहे. महापालिकेची निवडणूक जाहीर होताच ठाकरे बंधूंनी बाळासाहेब ठाकरे यांच्या स्मारकाचे काय केले असा सवाल महायुती सरकारला केला होता. हे बघता ठाकरे बंधू मुंबई महापालिकेच्या निवडणुकीत स्मारकाचा मुद्दा उपस्थित करून मतदारांना भावनिक साद घालणार असल्याचे दिसताच शिवसेनेचे नेते आणि उपमुख्यमंत्री एकनाथ शिंदे यांनी अकोला येथे जाहीर सभेत त्यास प्रत्युत्तर दिले.
बाळासाहेब ठाकरे यांच्या जन्मशताब्दी वर्षाचे औचित्य साधून हे संपूर्ण वर्ष लोकाभिमुख आणि कल्याणकारी उपक्रमांना समर्पित करण्याचा आमचा निर्धार आहे. जनतेच्या विकासातूनच बाळासाहेबांना खऱ्या अर्थाने अभिवादन करणार असल्याचा दावा यावेळी शिंदे यांनी केला.
महापालिकेच्या निवडणुकीच्या प्रचारासाठी शिंदे यांनी बुधवारी डाॅ. बाबासाहेब आंबेडकर मैदानावर सभा घेतली. शिंदे म्हणाले, मी नेहमीच विकासालाच प्राधान्य दिले आहे. बाळासाहेब ठाकरे आणि आनंद दिघे साहेबांच्या विचारांचा वारसा पुढे नेताना सामान्य माणसाच्या हिताला प्रथम स्थान देणे हीच शिवसेनेची परंपरा आहे. दिलेला शब्द पूर्ण करणे हे आम्ही बाळासाहेबांकडून शिकलो आहोत.
शिवसेना ही केवळ राजकीय नव्हे तर सामाजिक वाटचालीला दिशा देणारी चळवळ आहे. लाडकी बहीण या योजनेबाबत शिंदे यांनी स्पष्ट केले की, ही योजना बंद न होता पुढे आणखी बळकट होईल. राज्यातील लाखो महिलांना आर्थिक स्वावलंबन देणारी ही योजना कुटुंबव्यवस्थेला स्थैर्य देत आहे. महिलांचा सन्मान आणि सुरक्षा ही सरकारची प्राथमिक जबाबदारी आहे.
महिलांशिवाय समाजाचा विकास शक्य नसल्याचा पुनरुच्चार त्यांनी केला. मुलींना उच्च शिक्षणासाठी संधी उपलब्ध करून देणे, बेरोजगारी कमी करण्यासाठी उद्योगनिर्मितीवर भर देणे, तसेच शेतकऱ्यांसाठी सुरू असलेल्या योजनांचा उल्लेख करत शिंदे म्हणाले, शेतकरी, कामगार, महिला, तरुण या सर्व घटकांना सक्षम केल्याशिवाय राज्याचा सर्वांगीण विकास होऊ शकत नाही. त्यामुळे सरकारचा प्रत्येक निर्णय विकासकेंद्रित आणि लोकाभिमुखच राहील. शिवसेना ही जनतेच्या विश्वासावर उभी राहिलेली चळवळ असल्याचे सांगत त्यांनी कार्यकर्त्यांना सामाजिक संपर्क वाढवण्याचे आवाहन केले.
किती लोक जोडले, किती विश्वास कमावला हेच आमचे खरे भांडवल आहे, असे ते म्हणाले. या सभेला केंद्रीय राज्यमंत्री प्रतापराव जाधव, राज्यमंत्री संजय राठोड, माजी आमदार श्रीकांत देशपांडे, माजी आमदार डॉ. शशिकांत खेडेकर, उपनेते गोपीकिशन बाजोरिया आदी उपस्थित होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.