Dhananjay Munde: धनंजय मुंडेंच्या क्लिनचीटविरोधात सुप्रीम कोर्टात आव्हान देणार! सुरेश धस यांनी नेमकं काय म्हटलंय?

Dhananjay Munde: बीडचे सरपंच संतोष देशमुख यांच्या हत्येप्रकरणातील आरोप वाल्मिक कराड हा जवळचा सहकारी असल्यानं धनंजय मुंडे यांना आपल्या मंत्रीपदाचा राजीनामा द्यावा लागला होता. त्यानंतर कृषीमंत्री असताना मुंडेंनी केलेल्या कथित घोटाळा प्रकरणी हायकोर्टानं त्यांना क्लिनचीनचीट दिली होती.

या क्लीनचीटनंतर अजित पवारांनी मुंडेंना पुन्हा मंत्रिमंडळात सामावून घेण्याचे संकेत दिले होते. पण आता मुडेंच्या या क्लीनचिटविरोधात सुप्रीम कोर्टात धाव घेणार असल्याचं भाजपचे आमदार सुरेश धस यांनी सांगितलं आहे. पण नेमकं कोर्टात कोण जाणार? याबाबत धस काय म्हणालेत पाहुयात.

सुरेश धस यांना पत्रकारांनी प्रश्न विचारला की, मुंडेंना परत मंत्रिमंडळात घेणार असल्याचे संकेत अजित पवारांनी दिलेत. तसंच कृषी घोटाळ्यात त्यांना क्लीनचिटही देण्यात आली आहे. यावर धस म्हणाले की, त्याबाबतीत मी काही बोलू शकत नाही. हा त्यांच्या पक्षाचा प्रश्न आहे, परंतू याबाबतीत प्रकाशदादा बोलले आहेत. मला त्याबाबतीत बोलायचं नाही. पण त्या क्लीनचिटच्या विरुद्ध काही लोक हे सुप्रीम कोर्टात जाणार आहेत.

दरम्यान, धस यांनी दोन दिवसांपूर्वी कृषी विभागाचे प्रधान सचिव रस्तोगी यांना पत्र लिहिलं होतं. यामध्ये धनजंय मुंडे कृषी मंत्री असताना नॅनो युरिया, नॅनो डीएपी आणि कापूस साठवणूक बॅग खरेदीत कोट्यवधींचा भ्रष्टाचार झाला असून या प्रकरणी विशेष तपास पथक अर्थात एसआयटी नेमून चौकशी व्हावी अशी मागणी देखील धस यांनी केली होती.