ACB News : ठेकेदाराकडे 20 हजाराची लाच मागणाऱ्या सरपंच ACB च्या ताब्यात

ACB News : ठेकेदाराकडून वीस हजारांची मागणी करणाऱ्या महिला सरपंचाला लाचलुचपत विभागाच्या पथकाने ताब्यात घेतले आहे. निंबळक (जि, नगर) येथे हा प्रकार घडला आहे.

निंबळकच्या सरपंच प्रियांका अजय लामखडे (वय 35) यांच्यावर कारवाई करण्यात आली आहे. ग्रामपंचायतीचा लिपिक दत्ता वसंत धावडे (वय 40) यांच्याविरूध्द एमआयडीसी पोलीस ठाण्यात गुन्हा दाखल करण्यात आला आहे. दत्ता धावडे यालाही ताब्यात घेतले आहे. येथील लाचलुचपत विभागाच्या पथकाने मंगळवारी ही कारवाई केली.

याबाबतची तक्रार ठेकेदार यांनी येथील लाचलुचपत विभागाकडे केली होती. या तक्रारीचे अनुषंगाने मंगळवारी निंबळक येथे लाच पडताळणी केली असता सरपंच प्रियंका लामखडे व लिपिक दत्ता धावडे यांनी तक्रारदार यांच्याकडे 20 हजार रूपयाची मागणी करून सदर रक्कम सरपंच लामखडे यांनी लिपिक धावडे याच्याकडे देण्यास सांगितले. रक्कम मिळाल्यानंतरच तक्रारदार यांचे बिलाचे चेक वर सही करेन, असे सरपंच लामखडे यांनी सांगितल्याचे स्पष्टपणे निष्पन्न झाले आहे.

निंबळक गावातील निंबळक-लिंगतीर्थ रस्त्याचे मजबुती करण्याचे कामाचा ठेका जिल्हा परिषदेकडून सोनेवाडी (ता. नगर) येथील ठेकेदाराला मिळाला होता. या ठेकेदाराने संबधीत रस्त्याचे काम वेळेत पूर्ण करून केलेल्या कामाचे बील 13 लाख 65 हजार 56 रूपये मंजुरीसाठी जिल्हा परिषदमध्ये सादर केले होते. हे बिल मंजूर होऊन ग्रामपंचायत निंबळक यांचे बँक खात्यामध्ये जमा झाले होते. ठेकेदार यांना 12 लाख 38 हजार 556 रूपयांचा चेक सरपंच व ग्रामसेवक यांच्या सहीचा मिळाला होता.

ठेकेदार यांच्या बिलातील एक लाख 26 हजार रूपये रक्कम ‘जीएसटी’ पोटी ग्रामपंचायतने राखून ठेवली होती. तक्रारदार यांनी ‘जीएसटी’ पुर्तता करून एक लाख 26 हजार रूपये रकमेचा चेकची ग्रामपंचायत निंबळक, ग्रामसेविका यांच्याकडे मागणी केली होती, ग्रामसेविका यांनी चेकवर सही करून चेक तयार ठेवला होता. परंतु या चेकवर सही करण्यासाठी सरपंच प्रियंका लामखडे यांनी ठेकेदाराकडे 20 हजार रूपयांची मागणी केली होती, यावेळी लाचलुचपत विभागाने सापळा रचून सरपंचांना ताब्यात घेतलं आहे.