अमिर खानने घेतली दादा भुसेंची भेट; असा आहे 'प्लॅन'

मुंबई : अभिनेते अमिर खान (Amir Khan) यांनी पाणी फाउंडेशनच्या (Pani Foundation) माध्यमातून राज्यात पाणी बचतीची मोठी चळवळ उभी केली आहे. या माध्यमातून त्यांनी राज्यभरातील गावागावांत पोहचत पाणी जिरवण्यासाठी मोठं काम उभं केलं. आता इथंच न थांबता अमीर खान यांनी आता राज्यातील सोयाबीन (Soyabean) शेतीकडं आपलं लक्ष केंद्रीत केलं आहे.

राज्यातील सोयाबीन पीकाच्या वाढीसाठी अमीर खान यांनी पुढाकार घेतला आहे. त्यांनी पाणी फाऊंडेशनच्या माध्यमातून सोयाबीनची शेती कशी करावी, उत्पादन कसे वाढावे यासाठी ऑनलाईन सोयाबीन शेती शाळा भरविली होती. मागील काही दिवसांपासून त्यांचे हे प्रयत्न सुरू आहेत. आता फाउंडेशनच्या तज्ज्ञांनी शेतकऱ्यांच्या समस्या जाणून घेत नव्या सोयाबीन शेती कशी करावी, यासाठी ऑनलाईन पुस्तिका ही तयार केली आहे.

कृषी मंत्री दादा भुसे (Dada Bhuse) यांची भेट घेत अमीर खान यांनी या पुस्तिकेचे अनावरणही केले. सोयाबीन हे महाराष्ट्रातील प्रमुख खरीप पिकांपैकी एक पीक आहे. ज्या गावात पाणी फाऊंडेशन कार्यरत आहे, तेथील अनेक शेतकऱ्यांशी पाणी फाऊंडेशनने संवाद साधला आहे. अनेक शेतकरी सोयाबीनचे प्रति एकर 15-20 क्विंटल उत्पादन घेतात. काही विशिष्ट शेती पद्धतींचा अवलंब केल्यामुळे हे शक्य होत आहे. ही माहिती सर्व शेतकर्‍यांपर्यंत पोहोचवायचे असेल तर याचे एकच उत्तर होते ते ज्ञान डिजिटल पद्धतीने शेतकऱ्यांपर्यंत पोहोचवणे, असे अमीर खान यांनी सांगितले.

महात्मा फुले कृषी विद्यापीठ, राहुरी यांच्याशी संपर्क साधून डॉ. शरद गडाख यांनी आमच्या प्रस्तावाचे स्वागत केले. सोयाबीन शेतीच्या प्रत्येक बाबतीत शेतकऱ्यांना मार्गदर्शन करण्यासाठी त्यांनी तज्ज्ञांची टीम स्थापन केली. यामध्ये डॉ. मिलिंद देशमुख, डॉ.अनित दुर्गुडे, डॉ. नाद्रा भुते आणि सचिन महाजन हे या टीममध्ये आहेत. राहुरी विद्यापीठाच्या प्रसारण केंद्राचीही मदत झाली, अशी माहिती अमीर खान यांनी दिली.