Maharashtra Politic's : मोठ्या राजकीय घडामोडीचे संकेत : पवारांच्या भेटीनंतर भाजपच्या बड्या नेत्याची एकनाथ शिंदेंशी अर्धा तास चर्चा...

Mumbai, 09 July : ज्येष्ठ नेते शरद पवार आणि उपमुख्यमंत्री एकनाथ शिंदे यांच्या मंत्रालयातील भेटीमुळे राजकीय चर्चांना उधाण आलेले असताच आज पुन्हा एक मोठी राजकीय घडामोड घडली आहे. पवार-शिंदेंच्या भेटीनंतर राजकीय घडामोडींना वेग आला आहे. त्या भेटीनंतर भारतीय जनता पक्षाचे प्रदेशाध्यक्ष रवींद्र चव्हाण यांनी उपमुख्यमंत्री एकनाथ शिंदे यांच्यासोबत एकत्र प्रवास करत अर्धा तास राजकीय विषयावर चर्चा केली, त्यामुळे नव्या राजकीय घडामोडीचे स्पष्ट संकेत मिळत आहे.

महाराष्ट्र-कर्नाटक सीमा प्रश्नावर बुधवारी (ता. ०८ जुलै) मुख्यमंत्री देवेंद्र फडणवीस यांच्या अध्यक्षतेखाली मंत्रालयात बैठक झाली. त्या बैठकीला माजी मुख्यमंत्री शरद पवार यांनी हजेरी लावली. बैठकीनंतर शरद पवार यांनी उपमुख्यमंत्री शिंदे यांच्या दालनाला भेट दिली.

त्या वेळी एकनाथ शिंदे हे मंत्रिमंडळाच्या बैठकीत होते. पवार हे आपल्या दालनात आल्याची माहिती मिळताच शिंदे हे मंत्रिमंडळ बैठक अर्ध्यावर सोडून पवारांच्या स्वागतासाठी आले होते. त्याची जोरदार चर्चा रंगलेली असतानाच आज पुन्हा एक मोठी राजकीय घडामोड घडली आहे.

भारतीय जनता पक्षाचे प्रदेशाध्यक्ष रवींद्र चव्हाण आणि उपमुख्यमंत्री एकनाथ शिंदे यांनी आज एकाच गाडीतून प्रवास केला. खरं तर चव्हाण आणि शिंदे हे एकाच जिल्ह्यातील असल्याने त्यांच्यातील राजकीय वाद अनेकदा दिसून आलेला आहे.

नगरपालिका, महापालिका आणि झेडपी निवडणुकीत भाजप आणि शिवसेनेमधील राजकीय स्पर्धेमुळे दोघांमध्ये अनेकदा कटुता आल्याचे दिसून आले आहे. मात्र, हेच दोन नेते आज एकाच गाडीतून विधीमंडळात दाखल झाले आहेत. या दोघांमध्ये नवी मुंबई, ठाणे, पालघर आणि आसपासच्या जिल्ह्यातील राजकीय घडामोडींवर चर्चा झाल्याचे सांगण्यात येत आहे.

या दोघांसमवेत प्रवासात छत्रपती संभाजीनगरचे खासदार संदीपान भूमरेही होते. पवार शिंदे भेट आणि त्यानंतर रवींद्र चव्हाण यांचा शिंदेंसोबतचा एकत्रित प्रवास यामुळे राजकीय घडामोडींना मोठा वेग आला आहे. आगामी काळात राज्यात मोठ्या राजकीय घडामोडीचे संकेत मिळत आहेत.