Sanjay Raut On Ajit Pawar : संजय राऊतांनी उडवली अजित पवारांची खिल्ली; म्हणाले...

Mumbai News : राष्ट्रवादी काँग्रेस फुटल्यानंतर राज्य सत्तेत सहभागी झालेल्या अजित पवारांना पंतप्रधान नरेंद्र मोदींनी शरद पवारांना भाजपसोबत आणण्याची गळ घातल्याचा आरोप विरोधी पक्षनेते विजय वडेट्टीवारांनी केला आहे. तत्पुर्वी दोन्ही पवारांच्या पुण्यातील बैठकीवरून अनेक तर्क-वितर्क लढवले जात आहेत. त्यातच वडेट्टीवारांच्या विधानानंतर राजकीय वर्तुळात पुन्हा नवीन वादळ उठले आहे.

दरम्यान, उपमुख्यमंत्री अजित पवारांनी ज्येष्ठ नेते शरद पवारांना केंद्रात स्थान मिळवून देण्याची ऑफर दिल्याची चर्चा आहे. यावर ठाकरे गटाचे खासदार संजय राऊतांनी अजित पवारांना खोचक टोला लगावला आहे. (Latest Political News)

शरद पवारांना केंद्र सरकारमध्ये स्थान मिळवून देण्याच्या अजित पवारांच्या ऑफरवर राऊत म्हणाले, "अजित पवार इतके मोठे नेते नाहीत की शरद पवारांना ऑफर देऊ शकतील. पवारांनी अजितदादांना घडवले आहे. पवारांनी राज्यासह देशाच्या राजकारणात विविध पदांवर ६० वर्षांहून अधिक काळ काम करत आहेत. यामुळे राजकारणात पवारांची उंची खूप मोठी आहे. त्यामुळे अजित पवार, हसन मुश्रीफ हे ज्युनियर लोक त्यांना कसे ऑफर देऊ शकतील?"

दरम्यान, वडेट्टीवारांनी अजित पवारांबाबत केलेल्या दाव्यामुळे राज्यात एकच खळबळ उडाली होती. वडेट्टीवार म्हणाले होते, पंतप्रधान नरेंद्र मोदींनी मुख्यमंत्री बनण्यासाठी एक अट ठेवली आहे. शरद पवारांना आपल्यासोबत आणा त्यानंतरच अजितदादांना मुख्यमंत्री पद मिळेल, असे वडेट्टीवार म्हणाले होते. वडेट्टीवारांच्या या विधानानंतर राज्यात पुन्हा एकदा मुख्यमंत्री बदलाच्या चर्चा सुरू झाल्या आहेत.

पुण्यात शरद पवार-अजित पवारांच्या भेटीने महाविकास आघाडीत संभ्रमाचे वातावरण निर्माण झाले आहे. याबाबत पवारांनी भूमिका स्पष्ट करण्याची मागणी काँग्रेससह ठाकरे गटाने केली होती. यामुळे वडेट्टीवारांच्या बोलण्याच्या रोख या बैठकीकडेच असल्याचे बोलले जात आहे. मात्र आमची भेट कौटुंबिक असल्याचे दोन्ही पवारांनी स्पष्ट करून बैठकीवर पडदा टाकण्याचा प्रयत्न केला आहे.

(Edited by Sunil Dhumal)