ईडीच्या जबाबात सीताराम कुंटेंचा सुबोध जयस्वालांबाबत मोठा गौप्यस्फोट

मुंबई : माजी मुख्य सचिव सीताराम कुंटे (Sitaram Kunte) यांनी ईडीसमोर (ED)केलेल्या गौप्यस्फोटानं रोज नवीन माहिती मिळत आहे. माजी गृहमंत्री अनिल देशमुख यांनी पोलिसांच्या बदल्यांसाठी यादी पाठवल्याची माहिती कुंटे यांनी ईडीला दिली आहे. कुंटे यांनी आणखी गैाप्यस्फोट केला आहे. पोलिसांच्या बदल्यांमध्ये लॉबिंग झालेल्या आरोपांबाबत त्यांनी हा गौप्यस्फोट केला आहे. (Sitaram Kunte News)

एसआयडी रश्मी शुक्लांच्या (Rashmi Shukla) अहवालानंतर कारवाईसाठी मुख्यमंत्री उद्धव ठाकरे यांना पाठवलेल्या पत्राला तत्कालीन डीजीपी सुबोध जयस्वाल (Subodh Jaiswal) यांनी उत्तर दिलं नाही,'' असा गौप्यस्फोट सीताराम कुंटे यांनी ईडीला (ED) दिलेल्या जबाबात केला आहे.

''जुलै 2020 मध्ये तत्कालीन एसआयडी प्रमुख रश्मी शुक्ला यांनी पोलीस अधिकाऱ्यांच्या बदली पोस्टिंगमध्ये एखाद्या एजंटचा सहभाग आहे का? हे जाणून घेण्यासाठी काही फोन कॉल टॅप केले होते. त्या कॉल इंटरसेप्टच्या आधारे शुक्ला यांनी एक अहवाल तयार केला आणि तो DGP सुबोध जैस्वाल यांना पाठवला. त्यानंतर सुबोध जयस्वाल यांनी तो अहवाल 27 ऑगस्ट रोजी मला पाठवला. सुबोध जैस्वाल यांनी पाठवलेला तो अहवाल मुख्यमंत्री उद्धव ठाकरे यांच्या निदर्शनास आणून द्या, असे सांगण्यात आले होते. त्यानुसार तो अहवाल मुख्यमंत्र्यांकडे देण्यात आला. परंतु, शुक्ला यांनी केलेले कॉल इंटरसेप्ट हे कोरोना काळातील होते आणि कोरोना काळात कोणत्याही अधिकाऱ्याची बदली केली नव्हती,'' असे सीताराम कुंटे यांनी आपल्या जबाबबात म्हटलं आहे.

रश्मी शुक्ला यांच्या अहवालानंतर मुख्यमंत्र्यांनी 28 सप्टेंबर रोजी सुबोध जैस्वाल यांना पत्र पाठवले. यामध्ये अहवालात नमूद केलेल्या बाबी सरकारने गांभीर्याने घेतल्याचे म्हटले होते. शिवाय डीजीपींना असेही सांगण्यात आले होते की, त्यांनी गुन्हेगार पोलीस अधिकाऱ्यांच्या विरोधात काय कारवाई करावी? याबाबत पुराव्यासह प्रस्ताव पाठवावा. परंतु, या पत्राला डीजीपींकडून कोणत्याही प्रकारचे उत्तर आले नाही. त्यानंतर काही दिवसांनी विधानसभेत या अहवालाच्या आधारे विरोधी पक्षनेते देवेंद्र फडणवीस यांनी सरकारवर गंभीर आरोप केले होते.

सीताराम कुंटे यांनी त्यांच्या निवेदनात आणखी एक मोठा खुलासा केला आहे, तत्कालीन गृहमंत्री अनिल देशमुख यांनी त्यांना पोलिस अधिकाऱ्यांच्या बदलीबाबत दिलेल्या अनधिकृत यादीतून बहुतांश लोकांची नावे अंतिम यादीत होती. ''अनिल देशमुख यांच्याकडून त्यांना मिळालेली यादी पोलीस आस्थापना मंडळासमोर ठेवण्यात आली होती, जिथे त्यांनी बोर्ड सदस्याला तोंडी सांगितले की देशमुख यांनी हा अहवाल दिला होता, त्यानंतर ज्यांची नावे यादीत आली असती, त्यांच्याशी चर्चा करण्यात आली. हस्तांतरणाबाबत केलेले नियम आणि नियमानुसार कोणी बरोबर असेल तर त्याचे नाव अंतिम यादीत टाकले जायचे. देशमुख यांनी दिलेल्या यादीत बहुतांश लोकांची नावे अंतिम यादीत होती,'' असे कुंटे यांनी सांगितलं.