Eknath Shinde: नाराज झाले की गावाला अन् दिल्लीला का जातात? एकनाथ शिंदेंनी स्पष्टचं सांगितलं

Eknath Shinde: राज्याचे उपमुख्यमंत्री एकनाथ शिंदे हे महाविकास आघाडीतून बाहेर पडून महायुतीत गेल्यापासून अधुनमधून आपल्या सातारा येथील गावी जात असतात. त्याचबरोबर अनेकदा त्यांच्या दिल्लीवाऱ्याही होत असतात. पण ते जेव्हा सरकारमध्ये काहीतरी कारणानं नाराजी झाल्यावरच या दोन ठिकाणांना भेटी देतात, अशी कायमच चर्चा होत असते. पण हे खरं आहे का? ते नेमके कशासाठी गावाकडं निघून जातात? यावर खुद्द एकनाथ शिंदे यांनी स्पष्टीकरण दिलं आहे. साम टीव्ही न्यूजच्या 'ब्लॅक अँड व्हाईट' या मुलाखतीच्या कार्यक्रमात ते बोलत होते.

मुलाखतीवेळी एकनाथ शिंदेंना प्रश्न विचारण्यात आला की, तुमच्या बाबतीत एक असं चित्र तयार होतं की, एखादी गोष्ट जर मनासारखी झाली नाही की ते आपल्या गावी वाईला निघून जातात किंवा मग ते मंत्रिमंडळाच्या बैठकीलाच येत नाहीत. हे चित्र का तयार होतं? यावर उत्तर देताना शिंदे म्हणाले, हे चित्र तुम्हीच (मीडिया) तयार करता आम्ही कुठे तयार करतो. मला जेव्हा गावी जायचं असतं तेव्हा मी जातो. परवाच मी गावी गेलो होतो, तेव्हा काय नाराजी होती का? तेव्हा काय तिकीट वाटप बाकी होतं का? त्यामुळं गेलो मी गावी.

गावी गेलो की बातमी होते, दिल्लीला गेलो की बातमी होते. एनडीएचा घटकपक्ष म्हणून मला दिल्लीला जावं लागतं. त्यामुळं एनडीएचा भाग असल्यानं पंतप्रधान मोदी जेव्हा सर्व घटक पक्षांची बैठक बोलावतात तेव्हा आम्हाला जावं लागतं. एनडीएला मजबूत करण्यासाठी त्यांचा प्रयत्न सुरु आहे. त्यामुळं मी मोदींना भेटतो अमितभाईंना भेटतो. संबंधित लोकांना भेटतो. एनडीएनं आम्हाला म्हणजेच शिवसेनेला मान-सन्मान दिला आहे.

खासदार श्रीकांत शिंदेंना ऑपरेशन सिंदूरवेळी परदेशात गेलेल्या डेलिगेशनमध्ये समावेश करुन मोठा प्लॅटफॉर्म मिळवून दिला. त्यामुळं आमचं इतर पक्षांसारखं नाही. आमची विचारधारेवर झालेली युती आहे, स्वार्थासाठी आमची युती झालेली नाही. त्यामुळं मला काय मिळेल? मला काय मिळेल? असं यात नाही, असं यावेळी एकनाथ शिंदे यांनी बोलताना सांगितलं.