Chitra Wagh On Praniti Shinde : सैन्याच्या शौर्याला तमाशा म्हणणाऱ्या प्रणिती शिंदेंना लाज कशी वाटली नाही? : चित्रा वाघांचा सणसणीत टोला

Mumbai, 29 July : ‘ऑपेरशन सिंदूर’बाबत वादग्रस्त विधान करणाऱ्या काँग्रेस सोलापूरच्या खासदार प्रणिती शिंदे यांच्या विरोधात राजकीय वातावरण तापू लागले आहे. सोलापुरात प्रणिती शिंदेंच्या प्रतिमेला जोडे मारून त्यांचा निषेध करण्यात येत आहे. सोलापुरात भाजपचे आमदार देवेंद्र कोठे यांनी तर ‘आम्ही सोलापूरकर भारतीय सैन्याची माफी मागतो,’ असे म्हटले आहे. मुंबईत चित्रा वाघ यांनी ‘सैन्याच्या शौर्याला तमाशा म्हणणाऱ्या खासदार प्रणिती शिंदे यांना लाज कशी वाटली नाही?’ असा सवाल केला आहे.

संसदेत सोमवारपासून (ता. 28 जुलै) पहलगाम हल्ला आणि ऑपरेशन सिंदूरबाबत चर्चा सुरू आहे, त्या चर्चेत सहभागी झालेल्या सोलापूरच्या काँग्रेसच्या खासदार यांनी ऑपरेशन सिंदूर हे नाव देशभक्तीचे वाटते. पण, सरकारने माध्यमांमध्ये केलेला तो तमाशा होता, असे विधान केले होते. त्यावरून आमदार चित्रा वाघ (Chitra Wagh) यांनी प्रणिती शिंदे यांना सुनावले आहे.

भारतीय जनता पक्षाच्या विधान परिषद सदस्य चित्रा वाघ म्हणाल्या, भारतीय सैन्याच्या शौर्याला भरसंसदेत तमाशा म्हणणाऱ्या खासदार प्रणिती शिंदे (Praniti Shinde) यांना लाज कशी वाटली नाही? ज्या भारतीय लष्कराच्या बळावर तुम्ही, आम्ही सर्व नागरिक सुरक्षित आहोत. त्यांच्याबाबत अशी उपेक्षात्मक भाषा कशी करता.

ताई, एक फुकटचा सल्ला तुम्हाला देते. नाही तिथे तुष्टीकरणाचे राजकारण करायला जाऊ नका. हा केवळ भारतीय सैनिकांचा अपमान नाही तर प्रत्येक देशभक्त आणि नागरिकांच्या अस्मितेवरचा हा घाव आहे, असेही चित्रा वाघ यांनी नमूद केले.

‘प्रणिती शिंदे, सैनिकांच्या शौर्याला तमाशा म्हणणाऱ्यांना जनता कधीच माफ करत नाही, हे लक्षात ठेवा तुम्ही’ असा सूचक इशाराही आमदार चित्रा वाघ यांनी दिला आहे.

सोलापुरात जोडे मारो आंदोलन

दरम्यान, प्रणिती शिंदे यांच्या विरोधात भारतीय जनता पक्षाने सोलापूर आणि मंगळवेढ्यात जोडे मारो आंदोलन केल आहे. आमदार देवेंद्र कोठे यांच्या नेतृत्वाखाली सोलापूर शहरात हे आंदोलन करण्यात आले. त्यात कोठे यांनी प्रणिती शिंदे यांच्यावर तीव्र शब्दांत हल्लाबोल केला.