Nawab Malik: भावाच्या मदतीला बहिणीची धाव! मलिकांच्या क्लीनचिट विरोधात कोर्टात; यास्मीन वानखेडेंचे पोलिसांवर गंभीर आरोप

Nawab Malik: राष्ट्रवादी काँग्रेसचे ज्येष्ठ नेते नवाब मलिक यांना पोलिसांनी दिलेल्या क्लीनचीटवर आयआरएस अधिकारी समीर वानखेडे यांची बहीण यास्मीन शेख यांनी आक्षेप घेतला आहे. यासाठी त्यांनी कोर्टात धाव घेतली आहे. आपल्या याचिकेत त्यांनी पोलिसांवर अनेक गंभीर आरोप केले आहेत.

नेमकं प्रकरण काय?

नवाब मलिक यांच्याविरुद्धच्या बदनामीच्या तक्रारीची पोलिसांनी निष्पक्षपणे चौकशी केलेली नाही, असा आरोप IRS समीर वानखेडे यांची बहीण यास्मीन वानखेडे यांनी केला आहे. केवळ तथ्यं आणि तर्काच्या आधारे मलिकांना क्लीनचीट देण्याचा निर्णय पोलिसांनी घेतला आहे, असा दावाही त्यांनी याचिकेत केला आहे. यास्मीन वानखेडे यांनी मलिक यांचे विविध ट्विट्स आणि मुलाखतींचा दाखला देत आपल्याविरोधात त्यांनी खोटे, बदनामीकारक आणि निंदनीय आरोप केल्याचं यापूर्वी केलेल्या याचिकेत म्हटलं होतं. त्यांच्या या पूर्वीच्या याचिकेची दखल घेऊन वांद्रे दंडाधिकारी न्यायालयानं तत्कालीन फौजदारी प्रक्रिया संहिताच्या (सीआरपीसी) कलम २०२ अंतर्गत चौकशी आणि अहवाल सादर करण्याचे आदेश पोलिसांना दिले होते.

पण प्रथमदर्शनी मलिक यांच्याविरुद्ध दखलपात्र गुन्ह्याचा कोणताही पुरावा नाही, असं पोलिसांनी आपल्या चौकशी अहवालात म्हटलं आहे. तसंच मलिक यांनी केलेल्या पोस्ट आणि पत्रकार परिषद राजकीय पक्षाचे प्रवक्ते म्हणून त्यांच्या कर्तव्याचा भाग होते. वानखेडे यांच्याबद्दल त्यांचं कोणतंही वैयक्तिक वैर नाही, असंही मलिक यांनी सांगितल्याचंही पोलिसांनी आपल्या अहवालात नमूद केलं होतं, याद्वारे त्यांनी मलिक याना क्लीनचीटच दिली होती.

पण पोलिसांची ही भूमिका मान्य नसल्यानं याविरोधात यास्मीन वानखेडे यांनी वकील अली कासिफ खान यांच्यामार्फत कोर्टात निषेध याचिका दाखल केली आहे. आपल्या चौकशी अहवालामार्फत मलिक यांच्या वर्तनाचं समर्थन करण्याचा प्रयत्न पोलिसांनी केला असून हे कायद्याच्या तरतुदींविरोधात असल्याचा दावाही केला आहे. तसंच पोलिस चौकशी करण्यात अपयशी ठरल्याचंही त्यांनी म्हटलं आहे.