मराठा समाजासाठी ही सर्वात मोठी, महत्त्वाची आणि आनंदाची बातमी आहे. महाराष्ट्रात मराठा आरक्षण लागू झालं आहे. या संदर्भातील राजपत्र आणि बिंदू नामावली जारी करण्यात आलं आहे. राज्यात कालपासूनच (सोमवार) म्हणजे 26 फेब्रुवारीपासूनच मराठा समाजाला आरक्षण लागू झालेलं आहे. सध्या सुरू असलेल्या भरती प्रक्रियेसाठी हे आरक्षण नाही. मात्र, कालपासून सुरू झालेल्या किंवा यापुढे सुरू होणाऱ्या भरती प्रक्रियेसाठी आरक्षण लागू झालेलं आहे. आजच्या बजेटमध्ये पोलिस भरती तसेच अंगणवाडी सेविका भरतीच्या घोषणा झाल्या. आरक्षणाचा फायदा या भरती प्रक्रियेत होणार आहे.
मराठा समाजाला आरक्षण लागू करावं, ही मराठा समाजाची जुनी मागणी आहे. त्यासाठी मनोज जरांगे-पाटील (Manoj Jarange Patil) यांचं आंदोलनही सुरू आहे. दरम्यान, राज्य सरकारने 20 फेब्रुवारी रोजी विशेष अधिवेशन (Special Assembly Session for Maratha Reservation) घेऊन मराठा समाजाला 10 टक्के आरक्षण देण्याचे विधेयक एकमताने मंजूर केले. त्यानंतर काल या संदर्भातील राजपत्र आणि बिंदू नामावली जारी करण्यात आली.
हे मराठा आरक्षण (Maratha Reservation) नवीन भरतीसाठी आणि 26 फेब्रुवारीपासून लागू झालं आहे. महाराष्ट्र राज्य मागासवर्ग आयोगाच्या शिफारशीनंतर मराठा समाजाला 10 टक्के आरक्षण देण्याचा निर्णय राज्य सरकारने घेतला. याबाबत आयोगाकडून सर्वेक्षण करण्यात आले होते. त्यानंतर सर्वेक्षणाचा अहवाल मुख्यमंत्री एकनाथ शिंदे (Eknath Shinde), उपमुख्यमंत्री देवेंद्र फडणवीस (Devendra Fadnavis) यांच्याकडे सुपूर्द केला होता.
यामध्ये मराठा समाजाला नोकरी आणि शिक्षणात आरक्षण देण्यात यावे, अशी शिफारस केली होती. नोकरी आणि शिक्षणासाठी मराठा समाजाला 10 टक्के आरक्षण द्यावे, असे मागासवर्ग आयोगाच्या अहवालात नमूद केले होते.
(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)
मराठा समाजाला 10 टक्के आरक्षण देण्याचं विधेयक विधिमंडळानं मंजूर केल्यानंतरही मनोज जरांगे-पाटील नाराज होते. हे 10 टक्के आरक्षण मान्य नसल्याची प्रतिक्रिया मनोज जरांगे पाटील यांनी त्यावेळी दिली होती. राज्य सरकारने 'सगेसोयरे'ची काढलेल्या अधिसूचनेची अंमलबजावणी करावी, हीच आमची मागणी होती. मराठा समाजाला 10 टक्के आरक्षण द्या, अशी मागणी आमची नव्हतीच, असं म्हणत जरांगे-पाटील यांनी उपोषण सुरूच ठेवले होते.
(Edited by Avinash Chandane)
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
