Dadar Kabutarkhana : कबुतरखान्यासाठी शस्त्र हाती घेऊ म्हणणाऱ्या जैन मुनीविरुद्ध 'मराठी समिती' आक्रमक, आरपारची लढाई होणार!

Dadar Kabutarkhana Protest: दादरमधील कबुतरखाना बंद करण्याचे कोर्टाचे आदेश आहेत. प्रशासनाने कबुतरखाना बंद करत ताडपत्रीने तो झाकला होता. मात्र, जैन समुदाय प्रचंड आक्रमक झाला. त्यांनी आंदोलन करत कबूतरखान्यावरील ताडपत्री काढून टाकली, बांबू तोडले.

ताडपात्री तोडण्यासाठी तसेच दोऱ्या आणि सुतळ कापण्यासाठी हातात चाकू घेऊन महिला आल्या होत्या. मात्र, प्रशासनाने पु्न्हा हा कबुतरखाना बंद केला. त्यामुळे आक्रमक झालेल्या जैन मुनी निलेशचंद्र विजय यांनी धर्मासाठी शस्त्र हाती घेण्याची भाषा केली, धर्मासमोर न्यायालयाला मानत नसल्याचे म्हटले.

जैन मुनी, तसेच जैन समुदायातील काही लोक कबुतरखान्यासाठी आक्रमक झालेला असताना मराठी एकीकरण समिती मैदानात उतरली आहे. परप्रांतीय धार्मिक अतिरेक्यांना धडा शिकवला पाहिजे. नोकऱ्या, व्यवसाय करता ते करा, स्थानिकांच्या विरोधात, सरकारच्या विरोधात, पोलिसांच्या विरोधातील, नागरिकांच्या आरोग्याच्या विरोधातील कृत्य आम्ही खपवून घेणार नाही, असा इशारा समितीच्या वतीने देण्यात आला असून बुधवारी (ता.13) दादर येथील कबूतरखाना येथे आंदोलनासाठी जमण्याचे आवाहन देखील त्यांनी केले आहे.

'या धार्मिक अतिरेक्यांना स्थानिक माणूस विस्थापित करायचा आहे. मराठी लोकांचे बाजार, मासळी बाजार, कोळीवाडे नष्ट करायचे आहेत. गिरगावातील प्राचीन मंदिरे पाडून, जैन उप-आश्रय, देर-आश्रय बांधली जात आहेत.

मराठी राज्यात, स्थानिकांच्या जमिनीवर स्थानिकांना घर नाकारले जाते. मराठी भाषिकांना रोजगार नाकारला जातो. खाद्य संस्कृतीवर अतिक्रमण होते. केवळ मानव नव्हे तर कुत्रे, मांजर यांचे मांसाहार खाऊ नये, अशी बळजबरी केली जाते. ही कोणती खोटी 'जीवदया' हा कोणता "धर्म"?', असा सवाल देखील समितीकडून करण्यात आला आहे.

'नोकऱ्या, व्यवसाय करता ते करा. स्थानिकांच्या विरोधात, सरकारच्या विरोधात, पोलिसांच्या विरोधातील, नागरिकांच्या आरोग्याच्या विरोधातील कृत्य आम्ही खपवून घेणार नाही. खोट्या जीवदया प्रेमींना विरोध करा. हजारोच्या-लाखोंच्या संख्येने एकत्रित व्हा. या धार्मिक व शासनाच्या विरोधातल्या, कायदा न पाळणाऱ्या अतिरेक्यांना धडा शिकवा.', असे आवाहन समितीकडून करण्यात आले आहे.