BMC elections : मुंबईत जागावाटपाची कोंडी फुटली! असा असणार महायुतीचा फॉर्म्युला; बंडखोरी टाळण्यासाठी भाजपने उचलले मोठे पाऊल

Mumbai News : मुंबई महापालिका निवडणुकीसाठी उद्धव ठाकरे यांची शिवसेना व राज ठाकरेंच्या मनसेने युतीची घोषणा केली आहे. त्यामुळे आता महायुतीदेखील पूर्ण तयारीने रिंगणात उतरली आहे. गेल्या काही दिवसापासून महायुतीमधील भाजप व एकनाथ शिंदे यांच्या शिवसेनेची जागावाटपाबाबत चर्चा सुरु होती. ही चर्चेची कोंडी फुटली आहे. त्यामुळे जवळपास महायुतीचा फॉर्म्युला ठरला आहे. त्यातच आता भाजपने बंडखोरी टाळण्यासाठी सावधगिरीने पावले उचलण्यास सुरुवात केली आहे. त्यामुळे भाजप उमेदवारांची यादी आता सोमवारी जाहीर होणार असल्याचे समजते.

मुंबई महापालिका निवडणूकीसाठी महायुतीचा फॉर्म्युला जवळपास निश्चित झाला आहे. त्यानुसार मुंबई महापालिकेच्या 227 जागांपैकी भाजप 140 आणि एकनाथ शिंदेंची शिवसेना 87 जागा लढवणार असल्याची माहिती मिळत आहे. या महापालिकेमध्ये महायुतीतील अजित पवारांची राष्ट्रवादी स्वतंत्र लढणार आहे. त्यामुळे भाजप आणि शिवसेना मिळून 227 जागा लढवणार आहेत. याबाबत महायुतीकडून घोषणा कधी होणार, याकडे सर्वांचे लक्ष लागले आहे.

महायुतीच्या जागावाटपाच्या बैठकीत भाजपने मुंबईत शिंदे यांच्या शिवसेनेसाठी फक्त 52 जागा सोडण्याची तयारी दाखवली होती. मात्र, ठाकरे बंधूंच्या युतीनंतर भाजपने आता शिवसेनेला जास्त जागा देऊ केल्या आहेत. मात्र, महायुतीची घोषणा कधी होणार, याकडे सर्वांच्या नजरा लागल्या आहेत.

महायुतीबाबत जवळपास दोन्ही पक्षात आतापर्यंत चार बैठका पार पडल्या आहेत. उमेदवारी अर्ज दाखल करण्यासाठी शेवटचे चार दिवस शिल्लक असताना आता दोन्ही पक्षातील फॉर्म्युला जवळपास ठरला आहे. त्यानुसार आता भाजप 140 आणि एकनाथ शिंदेंची शिवसेना 87 जागा लढवणार असल्याची माहिती मिळत आहे. त्यामुळे घोषणा कधी केली जाणार याकडे सर्वांचे लक्ष लागले आहे.

राज्यातील मुंबईसह एकूण 29 महापालिकांमध्ये 15 जानेवारीला मतदान होणार आहे. मुंबई महानगरपालिकेच्या निवडणुकीत एकूण 227 प्रभागांसाठी मतदान होणार आहे. मुंबई महानगरपालिकेची मागील निवडणूक 2017 रोजी झाली होती. यावेळी शिवसेनेच्या किशोरी पेडणेकर महापौर म्हणून कार्यरत होत्या.