Prashant Jagtap : काँग्रेसच्या वाटेवर असलेल्या प्रशांत जगतापांना उद्धव ठाकरेंचा फोन, शिवसेनेच्या ऑफरवर म्हणाले, '2 ते 3 तासांत भाजपला आव्हान देणाऱ्या पक्षातच...'

Pune News, 26 Dec : दोन राष्ट्रवादी एकत्र येण्याच्या मुद्याला विरोध करत शरद पवारांच्या राष्ट्रवादी काँग्रेस पक्षातून बाहेर पडलेले शरद पवारांच्या राष्ट्रवादीचे माजी शहराध्यक्ष प्रशांत जगताप हे आज काँग्रेस पक्षात प्रवेश करणार असल्याच्या चर्चा सुरू असतानाच आता एक मोठी घडामोड घडली आहे.

ती म्हणजे शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी प्रशांत जगताप यांना फोन करत थेट आपल्या पक्षात येण्याची ऑफर दिली आहे. काल रात्री ठाकरेंनी जगताप यांना फोनवरून ही ऑफर दिली आहे.

तर ठाकरेंच्या या ऑफरनंतर आपण येत्या दोन ते तीन तासांत आपली भूमिका घेणार असल्याचं जगताप यांनी स्पष्ट केलं आहे. उद्धव ठाकरेंनी दिलेल्या ऑफर बाबत माध्यमांशी बोलताना प्रशांत जगताप म्हणाले, 'मला काल रात्री उशिरा उद्धव साहेबांचा फोन आला. माझ्यासारख्या सामन्य कार्यकर्त्याशी बोलण्यासाठी त्यांनी वेळ दिला यासाठी मी त्यांच आभार मानतो.'

शिवाय भाजपबरोबर जो माझा लढा आहे त्यालाही त्यांनी शुभेच्छा दिल्या. आमची नऊ मिनिटं चर्चा झाली. यावेळी तुम्ही माझ्या नेतत्वात काम करू शकता, शिवसेनेत या तुमचा योग्य तो सन्मान राखू, असं म्हणत ऑफर दिल्याचं सांगितलं.

तर उद्धव ठाकरेंची एक आक्रमक चेहरा आणि भाजपशी दोन हात करण्याची कायम तयारी असलेले नेते अशी ओळख असून जे-जे भाजप विरोधात लढा देत आहेत त्यांच्यासोबत जाणार अशी माझी भूमिका असल्याचंही ते म्हणाले.

तर काँग्रेसमध्ये जाणार का? असा प्रश्न विचारला असता जगताप म्हणाले, 'ज्या महायुतीमुळे राज्याचं वाटोळं झालं त्या तिन्ही पक्षात मी जाणार नाही. मी माझ्या राजकीय जिवनाचा आज निर्णय नक्की घेईन. माझी लढाई संविधान आणि पुरोगामी चळवळीसाठी आहे.

भाजपला आव्हान देऊ शकतात, अशा पक्षाची निवड करेन, यासाठी येत्या दोन ते तीन तासांत मी योग्य तो निर्णय घेईन,' असं त्यांनी स्पष्ट केलं. मात्र, आता आज प्रशांत जगताप यांचा टीळक भवनात काँग्रेसमध्ये प्रवेश होणार असं बोललं जात होतं. अशातच आता ठाकरेंच्या ऑफरमुळे ते काँग्रेसमध्ये जाणार की मशाल हातात घेणार हे पाहणं महत्त्वाचं ठरणार आहे.