Kunal Kamra Studio Attack : आधी तोडफोड करणाऱ्या उपमुख्यमंत्री शिंदेंच्या कार्यकर्त्यांवर FIR करा; अंजली दमानियांनी कायद्यानं घेरलं

Anjali Damania Latest Statement: शिवसेना नेता उपमुख्यमंत्री एकनाथ शिंदे यांच्यावर कॉमेडियन कुणाल कामरा यांनी केलेली व्यंगात्मक टिप्पणी चांगली झोंबली. शिंदेंच्या कार्यकर्त्यांनी यानंतर कुणाल कामरा यांच्याविरुद्ध मुंबईतील एमआयडीसी पोलिस ठाण्यात गुन्हा दाखल केला.

पण शिंदेंचे कार्यकर्ते एवढ्यावर थांबले नसून, कुणाल कामरा यांच्या स्टुडिओची तोडफोड केली आहे. सामाजिक कार्यकर्त्या अंजली दमानिया यावरून चांगल्याच आक्रमक झाल्या असून, अगोदर कायद्याचा बोला, असे सांगून शिंदेंचे कार्यकर्त्यांविरोधात अगोदर गुन्हा नोंदवा, अशी मागणी केली आहे.

कुणाल कामरा यांचा स्टुडिओची तोडफोड केल्यावरून अंजली दमानिया (Anjali Damania) यांनी ट्विट करत, एकनाथ शिंदे यांना सत्तेत असल्याची आठवण करून दिली आहे. कुणाल कामरा जे म्हणाले, ते अवडलं नसेल तर त्यांच्याविरुद्ध कायद्याने लढणं अपेक्षित आहे. पण स्वतः सत्तेत असताना कायदा हातात घेऊन हॉटेलमध्ये शिवीगाळ करणं, तोडफोड करणं याला गुंड प्रवृत्ती म्हणतात, जी आपल्याला दिसली, असे म्हटले आहे.

कुणाल कामरा यांची टिप्पणी सोडा, आधी FIR हा शिंदे गटाच्या सगळ्यांवर झाला पाहिजे, असे म्हणत अंजली दमानिया यांनी ट्विटरवर व्हिडिओ पोस्ट केला आहे. त्या हॉटेलचे झालेले नुकसान सुद्धा एकनाथ शिंदेंनी (Eknath Shinde) भरून दिले पाहिजे. आपण लोकशाहीत राहतो आणि इथं कायद्याचे राज्य राहील, गुंडगिरीचे नाही, असे अंजली दमानिया यांनी म्हटले आहे.

उपमुख्यमंत्री एकनाथ शिंदे यांच्यावर व्यंगात्मक टिप्पणीनंतर कॉमेडियन कुणाल कामरावर मुंबईतील एमआयडीसी पोलिस ठाण्यात गुन्हा दाखल करण्यात आला आहे. आमदार मुरजी पटेल यांनी पोलिसांकडे तक्रार दिली आहे. तत्पूर्वी, एकनाथ शिंदे गटाच्या शिवसेनेच्या कार्यकर्त्यांनी मुंबईतील खार येथील हॅबिटॅट कॉमेडी क्लबची तोडफोड केली.

हॅबिटॅट कॉमेडी क्लबमध्ये तोडफोड केल्याप्रकरणी शिवसेना नेते राहुल कनाल यांच्याविरोधात मुंबईतील खार पोलिस ठाण्यात गुन्हा दाखल करण्यात आला आहे. पहाटे चार वाजता पोलिसांनी राहुल कनाल यांना ताब्यात घेतले. भारतीय न्याय संहितेच्या संबंधित कलमांतर्गत राहुल कनालसह सुमारे 40 जणांवर गुन्हा दाखल करण्यात आला आहे.