Mumbai Mayor Legal Trouble: मुंबईच्या महापौर रितू तावडेंना सत्र न्यायालयाचा मोठा झटका! अर्ज फेटाळल्याने अडचणीत वाढ

Mumbai Political News: मुंबईच्या महापालिकेच्या महापौरपदाचा पदभार स्वीकारून रितू तावडे यांना महिनाभराचा कालावधी झाला आहे. काही दिवसापूर्वीच त्यांनी त्यांच्या कारवर लाल दिवा लावला असल्याने त्यांच्यावर विरोधकांनी आरोप केले होते. त्यानंतर त्यांनी गाडीवरील लाल दिवा काढला असल्याचे स्पष्ट केले होते.

त्यातच आता नऊ वर्षापूर्वीच्या एका खटल्यात महापौर तावडेंना सत्र न्यायालयाने मोठा झटका दिला आहे. त्यामुळे त्यांच्या अडचणी वाढल्या आहेत. वाकोला येथील मुंबई महापालिकेच्या उर्दू माध्यमाच्या शाळेतील दोन शिक्षकांना मारहाण केल्याप्रकरणी दाखल असलेल्या गुन्ह्यातून आरोपमुक्त करण्याचा रितू तावडे यांचा अर्ज मुंबई सत्र न्यायालयाने फेटाळला आहे. त्यामुळे याप्रकरणी आता खटला चालणार असल्याचे स्पष्ट झाले आहे.

वाकोला येथील उर्दू माध्यमाच्या शाळेत 29 जुलै 2016 रोजी घडलेल्या घटनेप्रकरणी तावडे यांच्याविरोधात आरोप निश्चित करण्यासाठी पुरेसे पुरावे असल्याचे निरीक्षण नोंदवत अतिरिक्त सत्र न्यायाधीश वाय. पी. मानथकर यांनी त्यांचा अर्ज नुकताच फेटाळला. याप्रकरणी पोलिसांनी नोंदवलेल्या एफआयआरनुसार, शास्त्री नगर, वाकोला, सांताक्रूझ पूर्व येथील या शाळेतील शिक्षिका शाहीन खान या कॅन्सरग्रस्त असूनही यांची अचानक वांद्रे-कुर्ला संकुलात बदली करण्यात आल्याने भाजपच्या तत्कालीन नगरसेविका रितू तावडे व अन्य काही जण नाराज होते.

त्यामुळे रितू तावडे (Ritu Tawade) व अन्य सहा जण मुख्याध्यापिक शरीफा मोमिन यांना जाब विचारण्यासाठी शाळेत गेले होते. त्यावेळी त्यांनी मुख्याधिपकांशी हुज्जत घातली आणि शाब्दिक चकमक वाढल्यानंतर रितू तावडे यांनी मोहम्मद याकुब रशीद व नदीम अहमद शेख यांच्या कानशिलात लगावली होती. या प्रकरणी गुन्हा दाखल करण्यात आला होता.

तर दुसरीकडे हे सर्व आरोप फेटाळताना रितू तावडे यांच्यातर्फे न्यायालयात युक्तिवाद करण्यात आला. त्यामध्ये मी त्याठिकाणी केवळ योगायोग म्हणून उपस्थित होते. कथित घटनेत गुन्हा करण्याचा कोणताही हेतू दिसत नाही.

भाजप (BJP) नगरसेविका असल्याने फिर्यादींनी प्रसिद्धी मिळवण्यासाठी माझ्या त्या राजकीय दर्जाचा गैरफायदा घेतला. शिवाय कथित घटना घडल्यानंतर 13 दिवसांच्या विलंबानंतर हा एफआयआर नोंदवण्यात आला. त्यावरून फिर्यादींची पश्चातबुद्धी व राजकीय कुहेतू स्पष्ट होतो, असे त्यांच्या वकिलांनी कोर्टात स्पष्ट केले.

या प्रकरणात सरकारी वकिलानी देखील बाजू मांडली. तावडे यांनीच मारहाण केल्याचे पीडितांनी जबाबांत स्पष्ट म्हटले आहे. शिक्षकांनी विद्यार्थ्यांसमोर आदर्श ठेवणे अभिप्रेत असताना त्यांच्याबाबत मारहाणीची घटना घडली. त्यामुळे याकडे गांभीर्याने पहायला हवे’, असा युक्तिवाद सरकारतर्फे सरकारी वकील इकबाल सोलकर यांनी मांडला. यामध्ये घटनेचे प्रत्यक्षदर्शी आणि साक्षीदारही असल्याचे स्पष्ट केले.

या प्रकरणात न्यायाधीशांनी दोन्ही बाजू तपासल्यानंतर, तावडे यांच्याविरोधात पीडित व अन्य साक्षीदारांनी थेट आरोप केल्याचे निरीक्षण नोंदवले. तसेच आरोपनिश्चितीच्या टप्प्यावर न्यायालयाने जबाबांची विश्वासार्हता तपासणे अभिप्रेत नसते.

आरोप निश्चितीसाठी पुरेसे पुरावे दिसत आहेत. त्यामुळे अर्ज मान्य केला जाऊ शकत नाही, असे स्पष्ट करत न्यायाधीशांनी तावडे यांचा अर्ज फेटाळून लावला. नऊ वर्षापूर्वीच्या या खटल्यात महापौर तावडेंना सत्र न्यायालयाने मोठा झटका दिला आहे. त्यामुळे त्यांच्या अडचणी वाढल्या आहेत.