Aditya Thackeray : "लाडकी बहीण योजनेचे पोस्टर बघितलं तरी इगो दुखावतोय..." आदित्य ठाकरेंचा फडणवीसांना टोला

Mumbai News, 06 Oct : "कोणाच्या तरी गर्वाचे हरण करणारी मेट्रो थ्री असून या मेट्रोचं काम महाविकास आघाडीने थांबवलं होतं. उद्धव ठाकरेंचा (Uddhav Thackeray) कोणता इगो दुखावला माहिती नाही, त्यांनी या मेट्रोच्या कामाला स्थिगिती दिली."

असा आरोप राज्याचे उपमुख्यमंत्री देवेंद्र फडणवीस यांनी ठाकरेंवर केला होता. तर फडणवीसाच्या याच आरोपाला शिवसेना उद्धव बाळासाहेब ठाकरे पक्षाचे नेते आदित्य ठाकरे यांनी प्रत्युत्तर दिलं आहे.

लाडकी बहीण योजनेचे पोस्टर बघितलं तर इगो कुणाचा दुखावतोय, हे कळेल, असं म्हणत आदित्य ठाकरेंनी (Aditya Thackeray) फडणवीसांना डिवचलं आहे. माध्यमांशी संवाद साधताना आदित्य ठाकरेंनी फडणवीसांना जनतेची दिशाभूल करायची असेल म्हणून असं वक्तव्य केल्याचा आरोप केला, शिवाय महाविकास आघाडीच्या काळात मेट्रो तीनचं काम एक दिवसही थांबलं नव्हंत असंही त्यांनी सांगितलं.

आदित्य ठाकरे म्हणाले, देवेंद्र फडणवीसांना (Devendra Fadnavis) चुकीची माहिती मिळाली असेल किंवा त्यांना जनतेची दिशाभूल करायची असेल. कारण महाविकास आघाडीच्या काळात मेट्रो तीनचं काम एक दिवसही थांबलं नव्हतं. मात्र, आम्ही आरे कारशेड हलवली होती.

कारण आम्हाला जंगल नष्ट करायचं नव्हतं. परंतु त्यांना आता पुन्हा जंगल नष्ट करायचं असून कांजूरमार्गची जागा अडाणींच्या घशात घालायची आहे, असा आरोप त्यांनी यावेळी केला. तर लाडकी बहीण योजनेचे पोस्टर बघितलं तर इगो कुणाचा दुखावतोय, हे कळेल अशा शब्दाच फडणवीसांच्या आरोपावर टोलाही लगावला.

देवेंद्र फडणवीस नेमकं काय म्हणाले?

शनिवारी ठाण्यातील कार्यक्रमात बोलताना फडणवीस म्हणाले, "मेट्रो तीन ही कोणाच्या तरी गर्वाचे हरण करणारी आहे. या मेट्रोला महाविकास आघाडीने रोखलं होतं. सर्वोच्च न्यायालयाने सांगितलं की, ही मेट्रो ग्रीन एनर्जीला चालना देणारी आहे. तरीही उद्धव ठाकरेंचा कोणता इगो दुखावला माहिती नाही, त्यांनी या मेट्रोच्या कामाला स्थिगिती दिली."