Pradeep Purnekar Case: मोठी बातमी: प्रदीप पूर्णेकर हत्या प्रकरणाचा तपास भारताबाहेर; 'क्राईम ब्रँच'ची टीम नेपाळमध्ये तैनात

Thane News: ठाण्यातील शिवसेना उद्धव बाळासाहेब ठाकरे पक्षाचे विभागप्रमुख प्रदीप पुर्णेकर यांची गेल्या आठवड्यात निर्घृण हत्या करण्यात आली होती. अज्ञात हल्लेखोरांनी पूर्णेकर यांच्यावर सात राऊंड फायर करतानाच त्यांच्यावर धारदार हत्यारांनी सपासप वार करत त्यांना संपवलं होतं. याच हत्येप्रकरणात सुरु असलेल्या पोलिस तपासात दिवसागणिक धक्कादायक खुलासे समोर येत आहेत. आता पूर्णेकर यांच्या हत्येप्रकरणाचा तपास आता भारताबाहेर पोहोचला आहे.

उद्धव ठाकरेंच्या शिवसेनेचे नेते प्रदीप पूर्णेकर यांच्या हत्या प्रकरणातील फरार आरोपींच्या शोधासाठी ठाणे गुन्हे शाखेने तपासाचा वेग वाढवला आहे. याप्रकरणी पोलिसांनी महाराष्ट्र-गोवा सीमेवरून पळून जाण्याच्या प्रयत्नात असलेले दोन प्रमुख आरोपी निखिल यादव आणि नितेश पवार यांना बेड्या ठोकल्या आहेत.

तसेच हत्येचा कट रचल्याचा संशय असलेला आरोपी सुभाष उर्फ पप्या शिंदे यालाही अटक करण्यात आली आहे. तो सध्या पोलीस कोठडी 9 ऑक्टोबर 2026 पर्यंत वाढवण्यात आली आहे.

पोलिसांनी दिलेल्या माहितीनुसार,प्रदीप पूर्णेकर यांचा खून करण्यासाठी आरोपींनी महिनाभर आधीच कट रचला होता आणि पूर्णेकर यांच्या हालचालींवर पाळत ठेवून रीतसर मॉक ड्रिल देखील केले होते.

हल्लेखोरांनी वापरलेल्या दोन्ही दुचाकी (बाईक्स) पोलिसांनी समतानगर परिसरातून जप्त केल्या आहेत. तसेच हल्लेखोरांना हत्येनंतर पळून जाण्यासाठी एक चारचाकीही घटनास्थळापासून काही अंतरावर पोलिसांनी जप्त केली आहे.

ठाणे पोलिसांकडून आता मुख्य मारेकऱ्यांना अटक झाली असली, तरी अद्याप काही फरार आरोपींचा शोध सुरू आहे. ठाणे गुन्हे शाखा खंडणी विरोधी पथकाच्या मदतीने या फरार आरोपींच्या मागावर आहे. हत्या प्रकरणातील फरार आरोपींच्या शोधासाठी गुन्हे शाखेची टीम नेपाळमध्ये तैनात करण्यात आली आहे.

प्रदीप पुर्णेकर हत्या प्रकरणातील फरार आरोपींच्या शोधासाठी ठाणे गुन्हे शाखेने तपासाचा वेग वाढवला आहे. फरार आरोपी परराज्यात किंवा परदेशात पळून जाऊ नयेत, यासाठी विविध ठिकाणी गुन्हे शाखेच्या टीम तैनात करण्यात आल्या आहेत.

विमानतळांसह महत्त्वाच्या ठिकाणी फरार आरोपींचे फोटो आणि माहिती पाठवण्यात आली असून, नेपाळमध्येही गुन्हे शाखेची टीम तैनात करण्यात आल्याची माहिती समोर आली आहे. दरम्यान, फरार आरोपी सोनू कनोजिया उर्फ टल्ली हा पोलिसांच्या हाती कधी लागतो, याकडे आता लक्ष लागलं आहे.