Maharashtra Politics : हिवाळी अधिवेशना दरम्यान फडणवीसांची भेट, पण प्रवेश शिंदेंच्या शिवसेनेत; मनसेला रामराम केलेल्या महाजनांनी अखेर आपला मार्ग निवडला

Mumbai News, 26 Dec : राज ठाकरेंच्या मनसेतून बाहेर पडलेले जेष्ठ नेते प्रकाश महाजन पुढे काय भूमिका घेणार? याकडे सर्वांच्या नजरा लागल्या होत्या. शिवाय त्यांनी नागपुरात हिवाळी अधिवेशन सुरू असताना राज्याचे मुख्यमंत्री देवेंद्र फडणवीस यांची भेट घेतली होती.

त्यामुळे ते भारतीय जनता पक्षात प्रवेश करणार असल्याच्या चर्चा देखील रंगल्या होत्या. मात्र, आता या सर्व चर्चांना पूर्णविराम मिळाला आहे. कारण अखेर प्रकाश महाजन यांनी उपमुख्यमंत्री एकनाथ शिंदेंच्या शिवसेनेत प्रवेश करणार असल्याचं स्पष्ट झालं आहे.

प्रकाश महाजन यांनी उपमुख्यमंत्री एकनाथ शिंदे यांची भेट घेतली. या भेटीत त्यांनी शिंदेंच्या शिवसेना पक्षात येण्याची इच्छा व्यक्त केल्याचं सांगितलं जात आहे. त्यानुसार आज दुपारी ठाण्यात महाजन शिवसेनेत पक्षप्रवेश करणार आहेत.

त्यामुळे आता एकीकडे ठाकरे बंधुंच्या युतीची घोषणा झाल्यानंतरही भाजप आणि शिंदेंच्या शिवसेनेत मोठ्या प्रमाणात इनकमिंग सुरू असल्याचं पाहायला मिळत आहे. प्रकाश महाजन हे मनसेचे प्रवक्ते होते. मात्र, पक्षातील अंतर्गत वादामुळे त्यांनी 13 सप्टेंबर रोजी पक्ष सोडला. त्यांच्या जाण्यामुळे मनसेला मोठा धक्का बसल्याचं बोललं जात होतं.

'माझा थोडं वय वाढलं असून काही गोष्टी मनाविरुद्ध घडतात. त्यामुळे मी पक्षातून बाहेर पडलो आहे. माझा बाकी कोणावर राग नसल्याचं स्पष्ट केलं होतं. शिवाय मी राष्ट्रीय स्वयंसेवक संघाचा माणूस असून मी ते कधीही लपवलं नाही' असं म्हणतच संघा संदर्भात बोलताना मी राज ठाकरेंना घाबरत नाही, असंही महाजन यांनी म्हटलं होतं.