Political Significance Behind Raj Thackeray’s Move : मागील दोन दिवस महाविकास आघाडीच्या नेत्यांसोबत मनसे अध्यक्ष राज ठाकरे यांनी निवडणूक आयोगाकडे आपली गाऱ्हाणी मांडली. बोगस मतदार, याद्यांमधील घोळ, आयोगाची स्थानिक स्वराज्य संस्थांच्या निवडणुका घेण्याबाबतची तयारी, असे अनेक मुद्दे आयोगासोबतच्या बैठकीत उपस्थित झाले. त्यानंतर आघाडीच्या नेत्यांसोबतच राज ठाकरे पत्रकार परिषदेलाही सामोरे गेले. त्यानंतर आता एक मोठी घडामोड समोर आली आहे.
राज ठाकरे यांनी महाविकास आघाडीतील नेत्यांसोबत आयोगाच्या अधिकाऱ्यांची भेट घेतल्यानंतर तातडीने पक्षाच्या पदाधिकाऱ्यांना मेळावा बोलविला असल्याचे समजते. ऐन दिवाळीत 19 ऑक्टोबर रोजी मुंबईत नेक्सो सेंटर येथे सकाळी 10 वाजता होणार आहे. मनसेचे प्रमुख पदाधिकाऱ्यांचा हा मेळावा असेल. यामध्ये राज ठाकरे पदाधिकाऱ्यांना काही महत्वाचा संदेश देऊ शकतात, अशी चर्चा आहे. साम टीव्हीने याबाबतचे वृत्त दिले आहे.
आगामी स्थानिक स्वराज्य संस्थांच्या निवडणुकीच्या पार्श्वभूमीवर विरोधी पक्षांच्या शिष्टमंडळाने मंगळवारी व बुधवारी असे दोन दिवस निवडणूक आयोगाच्या अधिकाऱ्यांसोबत चर्चा केली. या शिष्टमंडळामध्ये राज ठाकरे यांच्यासह राष्ट्रवादी काँग्रेस शरदचंद्र पवार पक्षाचे अध्यक्ष शरद पवार, शिवसेना उद्धव बाळासाहेब ठाकरे पक्षाचे प्रमुख उद्धव ठाकरे, काँग्रेस नेते बाळासाहेब थोरात यांच्यासह विरोधी पक्षांतील अनेक प्रमुख नेते होते.
महाविकास आघाडीतील नेत्यांसोबत एखाद्या राजकीय मुद्द्यांवर पहिल्यांदाच राज ठाकरे दिसले आहेत. स्थानिकच्या निवडणुकीमध्ये दोन्ही ठाकरे बंधू एकत्र येण्यावर जवळपास निर्णय झालेला आहे. त्यानंतर राज ठाकरे आघाडीच्या नेत्यांसोबत दोन दिवस होते. त्यामुळे ते आघाडीत सामील होणार का, याबाबतही आता चर्चांना उधाण आले आहे.
या भेटीनंतर राज यांनी तातडीने पदाधिकारी मेळावा बोलाविला आहे. विशेष म्हणजे ऐन दिवाळीत हा मेळावा होणार असल्याने तर्कवितर्क लढविले जाऊ लागले आहेत. राज ठाकरे पदाधिकाऱ्यांना काय मार्गदर्शन करणार, स्थानिकबाबत काही घोषणा करणार का, उद्धव ठाकरेंच्या शिवसेनेसोबत युतीबाबत किंवा आघाडीविषयी काही भाष्य करणार का, असे अनेक प्रश्न आता उपस्थित होऊ लागले आहेत.
दरम्यान, जोपर्यंत मतदार याद्यांमध्ये पूर्णपणे सुधारणा होत नाही तोपर्यंत निवडणूका घेऊ नका अशी मागणी आम्ही निवडणुक आयोगाकडे केली आहे. त्यावर निवडणूक आयोग काय निर्णय घेतं ते पाहू आणि आम्ही पुढचा निर्णय घेऊ, असे राज ठाकरे बुधवारी पत्रकार परिषदेत म्हणाले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.