RSS Centenary Event : 'ज्याने भारतावर बॉम्बिंग केलं त्याचा मुलगा सरसंघचालकांसोबत, संघाचं चारित्र्य किती बिघडलेलं...'; 'त्या' फोटोवरून राऊतांचा 'RSS'वर हल्लाबोल

Mumbai News, 09 Feb : राष्ट्रीय स्वयंसेवक संघाच्या (RSS) शताब्दी वर्षाच्या निमित्ताने मुंबईत सरसंघचालक मोहन भागवत यांच्या प्रमुख उपस्थितीत एका कार्यक्रमाचे आयोजन करण्यात आले होते. या कार्यक्रमासाठी अनेक सेलिब्रिटी आणि दिग्गजांनी हजेरी लावली होती.

ज्यामध्ये अभिनेता सलमान खान, गायक अदनान सामी, तसंच शिल्पा शेट्टीचा देखील समावेश होता. तर याच सेलिब्रिटींच्या उपस्थितीवरून आता ठाकरेंच्या शिवसेनेचे संजय राऊत यांनी आरएसएस आणि भाजपवर जोरदार हल्लाबोल केला आहे.

संघाच्या कार्यक्रमाला उपस्थित राहिलेल्या पाहुण्यांबद्दल बोलताना संजय राऊत म्हणाले, "संघाच्या कार्यक्रमात अनेक सिने कलाकार, शास्त्रज्ञ, विविध क्षेत्रांतले मान्यवर उपस्थित होते. त्यातल्या काही लोकांना पाहून आम्हाला भाजप आणि संघाच्या राष्ट्रभक्तीबद्दल धक्का बसला. किती ढोंग आणि पाखंड आहे? आम्ही पाहिलं गायक अदनान सामी हा सरसंघचालकांसोबत बसून ब्रेकफास्ट करतोय.

सरसंघचालकांना कदाचित माहिती नसावं किंवा कार्यक्रम आयोजित केलेल्यांना हे माहिती नसावं की सरसंघचालकांच्या बाजूला बसलेल्या अनेक व्यक्तींचा देशविरोधी कृत्यांमध्ये सहभागी आहे. अदनान सामीचे वडील अर्शद खान हे पाकिस्तानच्या हवाई दलात होते. 1965 च्या युद्धात अर्शद खान यांनी भारतावर बॉम्बिंग केलं होतं. पठणाकोटचा तळ उद्ध्वस्त केला होता.

तो अदनान सामी सरसंघचालकांच्या शेजरी बसला होता. तुम्ही भारताला कोणती प्रेरणा देत आहात? कोणत्या इतिहासाचे धडे देत आहात? असा सवाल उपस्थित करत राऊतांनी संघावर जोरदार टीके केली. शिवाय अदनान सामीटींप्रमाणेच गीतकार जावेद अख्तर यांना का बोलावलं नाही? त्यांचे काका अंदमानमध्ये सावरकरांबरोबर काळ्या पाण्याची शिक्षा भोगत होते.

हे बहुतेक माहिती नसेल, असंही राऊत यावेळी म्हणाले. मात्र, जावेद अख्तर आणि शाहरुख खान हे सगळे संघाच्या दृष्टीने राष्ट्रद्रोही आहेत. पण अदनान सामी, लुकआऊट नोटीस असणाऱ्या नट-नट्या हे संघ परिवाराच्या दृष्टीने नवीन राष्ट्रभक्त आहेत, असं म्हणत राऊतांनी संघाच्या कार्यक्रमावर टीका केली