Assembly Special Session : "इकडून जयंतराव, तिकडून तू, मग...", शिरसाटांची वैभव नाईकांना ऑफर; जोरदार जुगलबंदी

दीड वर्षापूर्वी एकनाथ शिंदे ( Eknath Shinde ) यांच्यासह काही आमदारांनी शिवसेनेत बंडखोरी केली. त्यामुळे महाविकास आघाडीचं सरकार कोसळलं आणि शिंदे-फडणवीस यांचं सरकार स्थापन झालं. शिवसेना पक्ष आणि धनुष्यबाण चिन्हही शिंदे गटाला मिळालं. यानंतर ठाकरे गटाला गळती लागली असून, अनेक नगरसेवक, आमदार, खासदारांनी शिंदे गटात प्रवेश केला. पण, काही कट्टर शिवसैनिक अद्यापही ठाकरेंच्या शिवसेनेत राहिले आहेत. अशातच शिंदे गटातील आमदार संजय शिरसाट यांनी ठाकरे गटातील आमदार वैभव नाईक यांच्यात जुगलबंदी पाहायला मिळाली आहे.

मराठा समाजाला आरक्षण ( Maratha Reservation ) देण्यासाठी मंगळवारी ( 20 फेब्रुवारी ) विशेष अधिवेशन बोलावण्यात आलं आहे. या अधिवेशनाला सर्वपक्षीय आमदार मुंबईत उपस्थित होते. या वेळी संजय शिरसाट आणि वैभव नाईक यांची भेट झाली. तेव्हा संजय शिरसाटांनी वैभव नाईकांना थेट शिंदे गटात येण्याची ऑफर दिली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

संजय शिरसाट म्हणाले, "जयंत पाटील एक येणारेत इकडनं... आणि तिकडनं तू येणारेस." त्यावर "माझं राहू द्या, तुमच्या शपथविधीचं काय झालं?" असं म्हणत नाईकांनी शिरसाटांना टोले लगावले.

दोघांत नेमका काय संवाद झाला?

वैभव नाईक - तुम्ही शपथ कधी घेताय?

संजय शिरसाट - तू आला तर आमच्याकडे मंत्रिमंडळ विस्तार होईल..

वैभव नाईक - अजित पवार आले.. अशोक चव्हाण आले...

संजय शिरसाट - जयंत पाटील येणारेत तिकडनं.. इकडून तू येणार आहे.. मग बरोबर शपथ घेता येईल.

वैभव नाईक - मी येणार आहे ते राहूदे... पण तुमच्या शपथविधीचं काय झालं?

संजय शिरसाट - आपण बरोबर शपथ घेऊ ना...

वैभव नाईक - तुम्ही त्या आणि या शिवसेनेचे संस्थापक सदस्य आहात..

संजय शिरसाट - नाहीतर तू मुख्यमंत्र्यांना सांग...

वैभव नाईक - आम्ही मुख्यमंत्र्यांना सांगू, ज्यांनी उठाव केला, त्यांना मंत्रिपद दिलं पाहिजे.. आम्ही कधी येणार नाही... आम्ही उद्धव बाळासाहेब ठाकरेंबरोबर राहणार आहोत.

संजय शिरसाट - रवींद्र वायकरसुद्धा असेच म्हणत होते...

वैभव नाईक - नाही, नाही... वायकर असुदेत.. पण आम्ही उद्धव ठाकरेंबरोबर आहोत...

R