Ajit Pawar On PM Post : शरद पवारांना पंतप्रधानपदाची संधी होती पण, काँग्रेसने.. ; अजित पवारांचा सर्वात मोठा खुलासा!

Mumbai News : भाजपप्रणित 'एनडीए'आघाडीच्या खासदारांच्या बैठकीमध्ये पंतप्रधान नरेंद्र मोदी यांनी राष्ट्रवादी काँग्रेसचे अध्यक्ष शरद पवार (Sharad Pawar) यांच्या पंतप्रधान पदाबाबत भाष्य केले होते. काँग्रेस पक्षाने शरद पवार यांना पंतप्रधान होण्याची संधी दिली नाही, असा जाहीर आरोप मोदींनी या बैठकीत केला होता. यावर विविध राजकीय प्रतिक्रिया उमटल्या होत्या. आता उपमुख्यमंत्री अजित पवारांनीही (Ajit Pawar) याबाबत प्रतिक्रिया देत मोदींनी केलेल्या आरोपाला दुजोरा दिला आहे. (Latest Marathi News)

पंतप्रधानांनी केलेल्या या आरोपावर विचारले असता अजित पवार म्हणाले,"त्यावेळेस राज्यात ४८ जागांपैकी आम्ही ३८ खासदार निवडून आलो. त्यानंतर आमच्यात अंतर्गत मतदान झालं होतं. आम्ही सर्वांनी शरद पवारांना पाठिंबा दिला. त्यावेळेस इतर राज्यातल्या बहुतांश काँग्रेस खासदारांनी पंतप्रधानपदासाठी पी. व्ही. नरसिंह राव यांना पाठिंबा दिला. म्हणून पीवी नरसिंह रावांच्या सरकारमध्ये शरद पवारांना संरक्षणमंत्रीपदाची जबाबदारी स्वीकारावी लागली. शरद पवारांना पंतप्रधानपदाचे प्रसंग दोन तीन वेळा आले होते. यात जे यश मिळायला हवे होते, ते यश दुर्दैवाने मिळालेली नाही."

अजित पवार पुढे म्हणाले, मोदींनी त्याचं मत मांडलं आहे. मोठ्या नेत्यांच्या बोलण्यावर आमच्या सारख्या कार्यकर्त्यांनी बोलणे योग्य नाही. खरंतर व्यक्तिगतरित्या अनेकदा शरद पवारांना अनेकदा पंतप्रधानपदाची संधी चालून आली होती . १९९१ या वर्षी मला बारामतीतून लोकसभेला तिकीट मिळाले होते. मी खासदार झालो होतो. राज्यातल्या सर्व ३८ खासदार यांनी पवारांनीच पंतप्रधान व्हावं, अशी मागणी केली होती. किंतु ते पूर्ण झालीच नाही."

मोदींनी काय केला होता आरोप ?

"भाजपा हा काही काँग्रेससारखा अहंकार असलेला पक्ष नाही. काँग्रेस पक्षाच्या घराणेशाही आधारीत राजकारणामुळेच शरद पवार यांना न कधीही देशाचे पंतप्रधानपदावर येऊ दिले नाही," असा आरोप नरेंद्र मोदींनी केला होता.