महापालिका निवडणुकांच्या तोंडावर उद्धव ठाकरेंनी पदाधिकाऱ्यांना सांगितली 'स्ट्रॅटेजी'!

मुंबई : आगामी महापालिका निवडणुकांसाठी (Municipal Elections) शिवसेनेने (Shivsena) कंबर कसली आहे. खुद्द शिवसेना पक्षप्रमुख व मुख्यमंत्री उद्धव ठाकरे (Uddhav Thackeray) यांनी नेते आणि पदाधिकाऱ्यांशी संवाद साधत या निवणुकांचे रणशिंग फुंकले आहे. आमच्यावर होणाऱ्या वैयक्तिक आरोपांना उत्तर देत बसू नका, असा सल्ला त्यांनी दिला आहे. याचवेळी शिवसेनेने महापालिका, राज्य सरकारच्या माध्यमातून केलेली कामे मतदारांपर्यंत पोचवा, असा कानमंत्रही त्यांनी दिला आहे.

मुंबई, ठाणे, नवी मुंबई, उल्हासनगर, वसई-विरार या महापालिकांसह राज्यातील 15 महापालिकांच्या निवडणुका या वर्षी होत आहेत. शिवसेनेचे पक्षप्रमुख उद्धव ठाकरे हे राज्याचे मुख्यमंत्री आहेत. त्यामुळे शिवसेनेसाठी ही निवडणूक महत्त्वाची आणि प्रतिष्ठेची आहे. या पार्श्वभूमीवर मुख्यमंत्री उद्धव ठाकरे यांनी स्वत: दृकश्राव्य माध्यमातून शिवसेना नेते आणि मुंबईतील वरिष्ठ पदाधिकाऱ्यांसोबत चर्चा केली.

या बैठकीत ठाकरे कुटुंबीयांवर होत असलेल्या आरोपांचा मुद्दा उपस्थित करण्यात आला. यावर मात्र आरोप-प्रत्यारोपाच्या राजकारणात अडकून न राहण्याचा सल्ला ठाकरेंनी पदाधिकाऱ्यांना दिला. ठाकरे म्हणाले की, आमच्यावर होत असलेल्या आरोपांना उत्तरे देण्यात वेळ वाया घालवू नका. आम्ही ते काम करू. शिवसेनेने महापालिका आणि राज्य सरकारच्या माध्यमातून केलेली कामे मतदारांपर्यंत पोचवा.

कोरोना काळातील मुंबई महापालिका आणि राज्य सरकारच्या कामांचाही ठाकरे यांनी आवर्जून या बैठकीत उल्लेख केला. मुंबई महापालिकेच्या निवडणुकीत 2017 मध्ये भाजपने शिवसेनेला चांगली टक्कर दिली होती. यंदाही भाजप पूर्ण ताकदीनिशी ही निवडणूक लढणार आहे. त्यामुळे मागील 30 वर्षांपासून मुंबई महापालिकेवर असलेले वर्चस्व टिकवून ठेवण्याचे आव्हान शिवसेनेसमोर आहे.

मुंबई महापालिकेतील सध्याचे संख्याबळ

एकूण नगरसेवक - 223 (चार जागा रिक्त)

शिवसेना - 97

भाजप - 83

काँग्रेस - 29

राष्ट्रवादी काँग्रेस - 8

समाजवादी पक्ष - 6

महाराष्ट्र नवनिर्माण सेना - 1

एआयएमआयएम - 2