विधानसभेतील पराभवानंतर चोवीस तासात शिवसेनेला दुसरा धक्का

मुंबई : विधानसभा अध्यक्ष पदाच्या निवडणुकीत भाजपच्या राहुल नार्वेकर यांनी बाजी मारली तर शिवसेनेला (Shivsena) पराभवाचा सामना करावा लागला. त्यानंतर चोवीस तासात शिवसेनेला आणखी एक मोठा धक्का बसला आहे. एकनाथ शिंदे यांनी बंडखोरी केल्यानंतर शिवसेनेचे अजय चौधरी यांची गटनेता म्हणून निवड करण्यात आली होती. आता अजय चौधरी यांची गटनेता म्हणून केलेली मान्यता रद्द करण्यात आली आहे. एकनाथ शिंदे हेच गटनेता असतील असे पत्र विधिमंडळ सचिवालयानं एकनाथ शिंदे यांना पाठवले आहे.

विधानमंडळ सचिवांनी मुख्यमंत्री एकनाथ शिंदे आणि भरत गोगावले यांना पाठवून याबाबत माहिती दिली आहे. शिवसेनेच्या वतीने अजय चौधरी यांची गटनेता म्हणून केलेली नियुक्ती रद्द करण्यात येत आहे. तर सुनिल प्रभू यांचीही मुख्य प्रतोद म्हणून केलेली नियुक्तीही रद्द करण्यात आली असून त्यांच्याजागी भरत गोगावले यांची मुख्य प्रतोद पदावर नियुक्ती करण्यात आल्याचे या पत्रात नमूद करण्यात आले आहे.

दरम्यान, विधानसभा अध्यक्षांच्या निवडणुकीत झालेल्या पराभवानंतर एकनाथ शिंदे आणि भरत गोगावले, हेच विधिमंडळाचे गटनेता आणि प्रतोत असतील असे विधी मंडळाने स्पष्ट केले आहे. या निर्णायामुळे आता शिवसेनेच्या कायदेशीर अडचणीही वाढल्या आहेत. या प्रकरणी शिवसेना कोर्टात दाद मागू शकते. तर आता महाविकास आघाडीसोबत असलेल्या शिवसेनेच्या 16 आमदारांच्या अडचणी वाढल्या आहेत. कारण, पक्षाने काढलेला व्हिप न बजावल्यामुळे त्यांच्यावर विधिमंडळात कारवाई होण्याची शक्यताही आहे.

एकनाथजी शिंदे यांची गटनेते, शिवसेना विधिमंडळ पक्ष आणि श्री भरत गोगावले मुख्य प्रतोद, शिवसेना विधिमंडळ पक्ष म्हणून रद्द करण्यात आलेली निवड ही आता नियम पडताळणी केल्यानंतर कायम करण्यात आली आहे. शिवसेना पक्षप्रमुख यांच्या स्वाक्षरीने त्यावेळी केलेली अजय चौधरी, गटनेतेआणि सुनील प्रभू, मुख्य प्रतोद यांची निवड रद्द करण्यात आलेली आहे. कायदेविषयक तरतुदींचा उहापोह करून या सर्व बाबी करण्यात आलेल्या आहेत आणि त्यानुसार अभिलेखात नोंद सुद्धा घेण्यात आली आहे.