Sunil Tatkare: सुनील तटकरे सिल्व्हर ओकवर शरद पवारांच्या भेटीला! राष्ट्रवादीच्या राष्ट्रीय कार्यकारिणीतून वगळल्याच्या चर्चेमुळं भेटीला महत्व; नेमकं काय घडलं?

Sunil Tatkare: राष्ट्रवादी काँग्रेसचे प्रदेशाध्यक्ष सुनील तटकरे हे सध्या ज्येष्ठ नेते शरद पवार यांच्या भेटीसाठी त्यांच्या सिल्व्हर ओक या निवासस्थानी पोहोचले आहेत. राष्ट्रवादी काँग्रेसच्या फुटीनंतर तसंच अजित पवारांच्या निधनानंतर तटकरे हे पहिल्यांदाच एकट्यानं शरद पवारांच्या भेटीसाठी गेले आहेत. राष्ट्रवादीच्या कार्यकारिणीतून प्रफुल्ल पटेल आणि सुनील तटकरे यांना वगळल्याची चर्चा दिवसभर सुरु होती. त्यातच तटकरेंनी अचानक शरद पवारांची भेट घेतल्यानं या भेटीबाबत अनेक तर्कवितर्क लढवले जात आहेत.

सुनील तटकरे हे शरद पवारांची भेट घेऊन त्यांच्या निवासस्थानावरुन बाहेरही पडले आहेत. बाहेर पडताना तटकरे यांनी माध्यमांच्या प्रतिनिधीशी बोलताना सांगितलं की, मी शरद पवारांच्या भेटीसाठी केवळ त्यांच्या प्रकृतीची विचारपूस करण्यासाठी गेलो होतो. याव्यतिरिक्त आमच्यात कुठलीही राजकीय चर्चा झालेली नाही. गेल्या अनेक काही दिवसांपासून शरद पवारांची तब्येत ठीक नव्हती. त्यामुळं त्यांच्या प्रकृतीची विचारपूस करण्यासाठी त्यांची भेट घेण्यासाठी मी वेळ मागितला होतो.

"गेले काही दिवस पवार साहेब हे ब्रीच कँडी रुग्णालयात उपचार घेत होते. मी आज गुवाहाटीला आसामच्या मुख्यमंत्र्यांच्या शपथविधीला गेलो होतो. उद्या मी पुन्हा दौऱ्यावर आहे पण आजच शरद पवारांना भेटीसाठी वेळ होता. त्यानंतर त्यांनाही वेळ मिळणार नाहीए. त्यामुळं मी आजच मी त्यांच्या तब्येतीची विचारपूस करण्यासाठी इथं आलो आहे, याशिवाय दुसरा कुठलाही विषय नाही. अजित पवारांच्या नेतृत्वाखाली आणि सुनेत्रा पवारांच्या नेतृत्वाखाली आम्ही जे काही काम करतो आहोत ते ठामपणे सुरुच राहणार आहे. राष्ट्रीय कार्यकारिणीचा विषयाचा या भेटीशी बिल्कुल संबंध नाही. यासंदर्भात सुनेत्रा पवारांनी स्वतः ट्विट केलेलं आहे, त्यामुळं आजची भेट ही केवळ शरद पवाराच्या तब्येची विचारपूस करण्यासाठीच होती" असं सविस्तर स्पष्टीकरण यावेळी सुनील तटकरे यांनी दिलं आहे.

राष्ट्रीय कार्यकारिणीतून वगळल्याची चर्चा

दरम्यान, राष्ट्रवादी काँग्रेसचे वरिष्ठ नेते राष्ट्रीय कार्याध्यक्ष प्रफुल्ल पटेल आणि सरचिटणीस तथा प्रदेशाध्यक्ष सुनील तटकरे यांच्या नावापुढील पदं वगळून राष्ट्रवादीच्या राष्ट्रीय अध्यक्षा सुनेत्रा पवार यांच्या सहीनिशी पक्षाच्या पदाधिकाऱ्यांची एक यादी निवडणूक आयोगाला दिल्याचं आज समोर आलं होतं. त्यामुळं केंद्रीय कार्यकारिणीतून पटेल आणि तटकरे यांना वगळण्यात आल्याची जोरदार चर्चा दिवसभर सुरु होती. या चर्चा सुरु झाल्यानंतर स्वतः सुनेत्रा पवार यांनी ट्विट करुन याबाबतही स्पष्टीकरण दिलं होतं. यात त्यांनी म्हटलं होतं की, माध्यमांमध्ये सध्या राष्ट्रवादीच्या पदाधिकाऱ्यांची जी यादी व्हायरल झाली आहे त्यात केवळ लेखनिकाची चूक होती ती लवकरच दुरुस्त करण्यात येईल.