Video: भाजप नेत्याची पाठ्यपुस्तक निर्मिती मंडळाच्या अध्यक्षपदी वर्णी; शक्ती प्रदर्शनासाठी काढली कार रॅली; ट्रॅफिक जामनं नागरिक वैतागले

BJP Leader Car Rally at Bhopal : पश्चिम आशियात सुरु असलेल्या युद्धजन्य परिस्थितीमुळं पंतप्रधान नरेंद्र मोदी यांनी नुकतेच देशवासियांना आवाहन केलंय की, पेट्रोल-डिझेलचा वापर कमी होईल यासाठी प्रयत्न करा. पण मोदींच्या या आवाहनाला धाब्यावर बसवत भाजपच्याच एका नेत्यानं शक्तीप्रदर्शनासाठी मोठी कार रॅली काढल्याचा आणि त्यामुळं वाहतूक कोंडी करुन जनतेला वेठीस धरल्याचा प्रकार नुकताच समोर आला आहे. या घटनेचा व्हिडिओ देखील सोशल मीडियात व्हायरल झाला आहे.

मध्य प्रदेशातील भोपाळमधील हा व्हिडिओ असून इथले भाजप नेते सौभाग्य सिंह ठाकूर यांची मध्य प्रदेशच्या पाठ्यपुस्तक निर्मिती महामंडळाचे अध्यक्षपदी वर्णी लागली. त्यानंतर त्यांना भलतचं आनंदाचं भरतं आलं आणि त्यांनी शक्तीप्रदर्शन करण्याचा निर्णय घेतला. यासाठी त्यांनी सायकल रॅली किंवा बाईक रॅली नव्हे तर थेट ५०० कारची रॅलीच काढली. यामुळं एकाचवेळी रस्त्यावर अनेक चारचाकी गाड्या आल्यानं मोठ्या प्रमाणावर वाहतूक कोंडी झाली. यामुळं नागरिकांना मोठा मनस्ताप सहन करावा लागला.

दरम्यान, या प्रकारामुळं आता पंतप्रधानांच्या आवाहनाला भाजपचेच नेते मंडळी, कार्यकर्ते, मंत्र्यांनी हरताळ फासली असल्याची चर्चा सुरु झाली आहे. तर सोशल मीडियातून युजर्स पंतप्रधानांसह भाजपच्या नेत्यांवर टीका करायला लागले आहेत. कारण मोठ-मोठ्या रॅलीज काढायला पंतप्रधानांसह भाजपचे नेते मंडळीच पुढे असल्याचा त्यांचा सोशल मीडियातला सूर आहे.

पंतप्रधानांचं आवाहन काय?

पंतप्रधान मोदींनी दोन दिवसांपूर्वी हैदराबादमध्ये त्यानंतर काल गुजरातच्या वडोदरात पुन्हा एकदा भारतीयांना आवाहन केलं की, पेट्रोल-डिझेलचा वापर कमी करा, खाद्य तेल कमी प्रमाणावर खा, वर्षभर सोने खरेदी करु नका, कंपन्यांनी वर्क फ्रॉर्म होम, ऑनलाईन कॉन्फरन्स त्याचबरोबर शाळांनी देखील ऑनलाईन वर्ग घेण्याला प्राधान्य द्यावं असं आवाहन केलं आहे. यामागे येण्याजाण्यासाठी पेट्रोल-डिझेलची बचत होऊन परदेशी चलन वाचवता येईल, असं मोदींचं म्हणणं आहे.