Shiv Sena Supreme Court : शिंदेंची धाकधूक वाढली, महापौर निवडीआधी सुप्रीम कोर्टात शिवसेनेचा फैसला? असीम सरोदेंनी सांगितलं काय होणार?

Eknath Shinde Uddhav Thackeray News : राज्यात सध्या जिल्हा परिषदा व पंचायत समित्यांच्या निवडणुकांची धामधुम सुरू आहे. नुकत्याच महापालिका निवडणुका पार पडल्या असून आता सत्तास्थापनेसाठी चढाओढ सुरू आहे. प्रामुख्याने भाजप आणि एकनाथ शिंदे यांच्या शिवसेनेमध्ये अनेक ठिकाणी काँटे की टक्कर आहे. एकीकडे सत्तास्थापनेची समीकरणे जुळविली जात असताना सुप्रीम कोर्टात शिवसेनेचा फैसला होण्याची शक्यता आहे.

शिवसेनेचे नाव व धनुष्यबाण हे चिन्ह भारतीय निवडणूक आयोगाने शिंदे गटाला दिले आहे. त्याविरोधात उद्धव ठाकरेंनी सुप्रीम कोर्टात याचिका दाखल केली आहे. या याचिकेवर बुधवारी (ता. २१) सुप्रीम कोर्टात सुनावणी होणार आहे. त्यामुळे संपूर्ण देशाचे लक्ष या सुनावणीकडे लागले आहे.

ठाकरेंच्या पक्षाची कोर्टात बाजू मांडणारे विधिज्ञ असीम सरोदे यांनी सोशल मीडियात पोस्ट करून याबाबत माहिती दिली आहे. त्यांनी म्हटले आहे की, शिवसेना नाव आणि धनुष्यबाण हे पक्षचिन्ह सुनावणीची तारीख उद्या सुप्रीम कोर्टात आहे. पण 37 नंबरचे मॅटर सुनावणीसाठी येणे कठीण आहे, अशी साशंकताही सरोदे यांनी व्यक्त केली आहे.

आता लोकांचा नवीन प्रश्न, जर एकनाथ शिंदेंकडून पक्ष चिन्ह व शिवसेना नाव काढून घेतले तर मुंबई महापालिकेत काय होईल?, असे सांगत सरोदे यांनी म्हटले आहे की, मला वाटते शिंदेसेना भाजपमध्ये विलीन होईल व एकनाथ शिंदे यांचे राजकीय महत्व एकदम कमी होईल. शिंदेसेनेतील अनेकजण उद्धव ठाकरेंकडे स्वगृही परत जातील व मूळ शिवसेना अधिक ताकदवान होईल.

उद्धव आणि राज ठाकरे मिळून मुंबई महापालिकेतील राजकारण फिरवू शकतील. सर्वोच्च न्यायालयातील एका निर्णयामुळे सुरु झालेला खेळ, सर्वोच्च न्यायालयचं कधीतरी संपवेल, असेही सरोदे यांनी म्हटले आहे. दरम्यान, सुप्रीम कोर्टात आमदार अपात्रतेबाबतही ठाकरेंच्या शिवसेनेने याचिका दाखल केलेली आहे. त्यावरील सुनावणीही प्रलंबित आहे. राष्ट्रवादी काँग्रेस शरदचंद्र पवार पक्षाचीही पक्ष व चिन्हाबाबत सुप्रीम कोर्टात याचिका असून त्यावरही उद्या सुनावणी होण्याची शक्यता आहे.