Uddhav Thackeray News : गृहमंत्र्यांना पदावर राहण्याच्या अधिकार नाही; रोशनी शिंदेंवरील हल्ल्यानंतर ठाकरे आक्रमक!

Uddhav Thackeray On Roshani Shinde Attack : ठाण्यात ठाकरे गटाच्या कार्यकर्त्या रोशनी शिंदे यांना शिंदे गटाच्या महिला कार्यकर्त्यांनी मारहाण केल्याचा प्रकार घडला. या मारहाणीत रोशनी शिंदे (Roshni Shinde) यांना गंभीर दुखापत झाली आहे. त्यांच्यावर सध्या उपचार सुरु आहेत. यावर आता शिवसेना ठाकरे गटाचे प्रमुख उद्धव ठाकरे (Uddhav Thackeray) संतप्त होऊन, शिंदे गट व भाजपला इशारा दिला आहे.

ठाकरे म्हणाले, "आयुक्त काय सरकारचं घटक म्हणून काम करत आहेत का अशी शंका येते. फडतूस गृहमंत्री आपल्याला लाभलेला आहे. अत्यंत लाचार, लाळघोटेपणा करणारा, नुसती फडणवीसी करणारा एक माणूस, गृहमंत्री म्हणून मिरवतोय. यांची गुंडगिरी वाढत चाललेली आहे. ठाण्यातल्या एका पत्रकाराला धमकी देण्यात आली, रोशनीकडून माफीचा व्हिडीओ करण्यात आला. फडतूस गृहमंत्र्याला पदावरती राहण्याचा काहीच अधिकार नाही," असे उद्धव ठाकरे म्हणाले.

"सरकारचं ओळखंच नपुंसक असेल तर कोणाकडून काय अपेक्षा करायची, ठाण्याची ओळख शिवसेनेचं ठाणं, धर्मवीर आनंद दिघेंचं ठाणं, सुसंस्कृत ठाणं अशी ओळख आहे. ती ओळख पुसून गुंडाचं ठाणं अशी ओळख करण्याचा प्रयत्न केलं जात आहे. महिलांची गँग बनायला लागली, महिला गुंडगिरी करायला लागल्या, तर ठाण्याचं काय होणार? हा एक प्रश्न आहे," असे ठाकरे म्हणाले.

"यांची गुंडगिरी महाराष्ट्रातून उखडून फेकून देवू शकतो. मी ठाण्याच्या आयुक्तालय गेलो तर तिथे आय़ुक्तच नाहीत. रोशनी शिंदेंनी याबाबत पत्र लिहले आहे. गुंड महिलांनी हल्ला केला त्यांच्याविरोधात तक्रार अजूनही नोंदवून घेतलेलं नाही," असेही ठाकरे म्हणाले.

काय आहे प्रकरण?

ठाण्यात ठाकरे गटाच्या कार्यकर्त्या रोशनी शिंदे यांना शिंदे गटाच्या महिला कार्यकर्त्यांनी मारहाण केल्याचा प्रकार घडला. या मारहाणीत रोशनी शिंदे यांना गंभीर दुखापत झाली आहे. त्यांच्यावर सध्या उपचार सुरु आहेत. उद्धव ठाकरे आणि त्यांच्या पत्नी रश्मी ठाकरे यादेखील रोशनी शिंदे यांची दवाखान्यात जाऊन त्यांची भेट घेतली.