Uddhav Thackeray News : रामदास कदम यांना 'करारा जवाब' मिळणार; ठाकरेंनी सर्वात विश्वासू शिलेदारावर टाकली महत्वाची जबाबदारी  

Ramdas Kadam to Face Strong Political Reply : शिवसेनेचे फायरब्रँड नेते रामदास कदम यांनी माजी मुख्यमंत्री उद्धव ठाकरे यांच्याविषयी धक्कादायक आरोप केले आहे. बाळासाहेब ठाकरे यांचा मृतदेह दोन दिवस मातोश्रीत ठेवला होता, असा दावा त्यांनी केला आहे. उद्धव ठाकरेंनी त्यांच्या हाताचे ठसे घेतले, असा दावा कदमांनी केला आहे. आता त्याला उद्धव ठाकरे यांच्याकडून प्रत्युत्तर दिले जाणार आहे.

शिवसेनेच्या दसरा मेळाव्यामध्ये रामदास कदम उद्धव ठाकरेंवर तुटून पडले होते. या मेळाव्यात बाळासाहेबांच्या मृतदेहाबाबत केलेल्या विधानावर ते शुक्रवारीही ठाम राहिले. आपण भाषणाच्या ओघात ते बोलल्याचे आज कदम यांनी सांगितले. पण त्यावर आपण ठाम असल्याचे सांगत उद्धव ठाकरे आणि आपली नार्को टेस्ट करावी, असे आव्हानही त्यांनी दिले.

रामदास कदम यांच्या आरोप, दाव्यांना आता ठाकरेंकडून उत्तर दिले जाणार आहे. त्यासाठी त्यांनी सर्वात विश्वासू सहकारी आमदार अनिल परब यांची निवड केली आहे. कदम यांच्या आरोपांना परब यांच्याकडून शनिवारी पत्रकार परिषदेतून उत्तर दिले जाणार आहे. त्यामुळे परब नेमके काय-काय बोलणार, याकडे संपूर्ण महाराष्ट्राचे लक्ष लागले आहे.

आज खासदार संजय राऊत, भास्कर जाधव, अंबादास दानवे, चंद्रकांत खैरे, सुषमा अंधारे आदी नेत्यांनी रामदास कदम यांच्यावर टीका केली होती. आता अनिल परब शनिवारी कदम यांच्यावर पलटवार करणार आहेत. परब आणि कदम यांच्यामध्ये अनेकदा खटके उडाले आहेत. अत्यंत टोकाचा राजकीय विरोध दोघांकडूनही होतो.

रामदास कदम यांनी आपले पुत्र गृहराज्यमंत्री योगेश कदम यांची राजकीय कारकीर्द संपविण्यासाठी परब प्रयत्नशील होते, असा आरोप कदम यांनी अनेकदा केला आहे. मुलाबाबतीत त्यांनी इतर अनेक गंभीर आरोपही केले होते. परब यांनी कदम यांच्या मुंबईतील डान्सबारचा मुद्दा विधानपरिषदेत उपस्थित करत योगेश कदम यांच्या राजीनाम्याची मागणी केली होती. या मुद्द्यावरून कदम आणि परब यांच्यात जोरदार शाब्दिक चकमक उडाली होती. आता पुन्हा एकदा रामदास कदम यांना अनिल परब हे कसे प्रत्युत्तर देणार, याबाबत उत्सुकता वाढली आहे.