Jyoti Waghmare: ज्योती वाघमारे यांनाच उमेदवारी का? शिवसेनेच्या जुन्या नेत्यानं सांगितलं कारण

Jyoti Waghmare: राज्यसभेसाठी शिवसेनेत अनेक जुने आणि दिग्गज नेते इच्छुक असतानाही या सर्वांना डावलून पक्षाचे मुख्य नेते आणि राज्याचे उपमुख्यमंत्री एकनाथ शिंदे यांनी पक्षात तुलनेत नवख्या असलेल्या प्रा. डॉ. ज्योती वाघमारे यांना उमेदवारी दिली. यावर अनेकांनी आश्चर्य व्यक्त केलं असलं तरी त्यांनाच का उमेदवारी दिली याचं कारण शिवसेनेच्या एका जुन्या नेत्यानं सांगिलं आहे.

इच्छुकांची भाऊगर्दी

शिवसेनेचे सुरुवातीच्या काळातील नेते आणि ज्यांनी बाळासाहेब ठाकरे यांच्यासोबत काम केलं ते म्हणजे गजानन किर्तीकर. स्वतः किर्तीकर हे राज्यसभेवर जाण्यासाठी इच्छुक होते. त्याचबरोबर आनंदराव अडसूळ, संजय मंडलिक, संजय निरुपम, शायना एनसी आणि राहुल शेवाळे हे लोक इच्छुक होते. यांपैकी सुरुवातीला राहुल शेवाळे यांचं नाव अंतिम झाल्याची नुसतीच चर्चा होती. तर आपल्याला एकनाथ शिंदेंनी शब्द दिला होता असं आनंदराव अडसूळ यांनी सातत्यानं म्हटलं होतं. तर लोकसभा निवडणुकीतून मुलगा अमोल किर्तीकरसाठी माघार घेतलेले गजानन किर्तीकर हे देखील राज्यसभेवर जाण्यासाठी इच्छुक होते. तर कोल्हापुरला संधी मिळावी म्हणून संजय मंडलिक यांनीही राज्यसभेसाठी इच्छा व्यक्त केली होती.

वाघमारेंचं नाव योग्य का?

पण अखेर या सर्वच लोकांना डावलून ज्योती वाघमारे यांच्या नावावर शिक्कामोर्तब करण्यात आलं. वाघमारे यांच्या उमेदवारीमुळं शिवसेनेतच नव्हे तर शिवसेनेच्या बाहेरही लोकांनी आश्चर्य व्यक्त केलं. पण यामागे एकनाथ शिंदे यांची रणनीती होती, हे आता समोर आलं आहे. याचं कारण म्हणजे खुद्द गजाननं किर्तीकर यांनी आता वाघमारे यांचं नाव जाहीर केलं हे योग्यचं झालं असल्याचं म्हटलं आहे. त्याच कारण म्हणजे वर उल्लेख केलेल्या इतर कोणालाही राज्यसभेच्या जागेवरुन उमेदवारी दिली असती तर दुसरा इच्छुक नाराज झाला असता आणि बंडखोरीची शक्यता निर्माण झाली असती.

नाराज नाही - किर्तीकर

त्याचबरोबर जुन्यांना त्यांच्या राजकीय कारकीर्दीत सर्वकाही मिळालेलं असतं. मला सुद्धा कुठल्या कारणासाठी उमेदवारी पाहिजे याची कैफियत मी मांडली. पण त्याच्या पलिकडे जाऊन ज्यावेळी पक्षाचा नेता असा विचार करतो की बहुजन समाजातील एका सुशिक्षित महिलेला जर आपण संधी दिली तर एक चांगला संदेश संपूर्ण महाराष्ट्रभर जाईल, त्यामुळं मी या निर्णयाचं मी स्वागत करतो, मी याबाबत नाराज नाही, असंही किर्तीकर यांनी यावेळी स्पष्ट केलं.