घरांवर पक्षाचा झेंडा फडकावत भाजप कार्यकर्त्यांनी केला स्थापनादिन साजरा...

पिंपरी : भाजप पक्षाचा (BJP) स्थापनादिन बुधवारी (ता.६ एप्रिल) देशभर मोठ्या जल्लोषात साजरा करण्यात आला. पिंपरी-चिंचवडमधील (Pimpri-Chinchwad) पक्ष पदाधिकाऱ्यांनीही यानिमित्त आपल्या घरांवर पक्षाचा झेंडा फडकावला. तसेच त्यांनी शहरात अभिमान अभियान सुरु केले असून ते १० तारखेपर्यंत चालणार आहे.

भाजपच्या माजी महापौर माई ऊर्फ उषा ढोरे (Usha Dhore) यांनी शहर पक्ष कार्यालयात ध्वजारोहण केले. यावेळी त्यांनी पदाधिकारी व कार्यकर्त्यांना शुभेच्छा दिल्या. भाजपची कार्यकर्ती असल्याचा अभिमान आहे, असे त्या यावेळी म्हणाल्या. शहर सरचिटणीस राजू दुर्गे, महिला शहराध्यक्षा उज्ज्वला गावडे, युवा मोर्चा शहराध्यक्ष संकेत चोंधे आदी यावेळी उपस्थित होते.

स्थापना दिनानिमित्त पंतप्रधान नरेंद्र मोदी(Narendra Modi) यांनी आज भाषण केले. त्याचे लाईव्ह प्रक्षेपण शहर भाजपने केले. त्यासाठी मंडल स्तरावरही स्क्रिन लावण्यात आले होते. पक्ष पदाधिकारी, शक्ती केंद्रप्रमुख व काही कार्यकर्त्यांनी आपल्या घरावर पक्ष स्थापनादिनी पक्षाचा झेंडा फडकावला. भाजप शहराध्यक्ष आमदार महेश लांडगे यांच्या नेतृत्वात स्थापना दिनानिमित्त विविध उपक्रमांचे आयोजन शहरात करण्यात आले आहे. त्यात शहरातील माजी सैनिक, ज्येष्ठ नागरिक, प्रबुद्ध नागरिक यांचा सत्कारही करण्यात येणार आहे, असे पक्षाचे संघटन सरचिटणीस अमोल थोरात यांनी सांगितले आहे.