CBI Raid Pune : अतिरिक्त विभागीय आयुक्त रामोडांना १३ जूनपर्यंत सीबीआय कोठडी

CBI Arrest Anil Ramod : पुण्यातील महसूल विभागतील अतिरिक्त विभागीय आयुक्त डॉ. अनिल गणपतराव रामोड यांना शुक्रवारी (ता. ९) लाचप्रकरणी रंगेहात पकडण्यात आले. ही कारवाई 'सीबीआय'ने केली. त्यांना आठ लाख रुपायांची लाच घेताना अटक करण्यात आली. त्यांना शनिवारी (ता. १०) न्यायालयात हजर केले. त्यावेळी रामोड यांना 'सीबीआय' न्यायालयाचे विशेष न्यायाधीश ए. एस. वाघमारे यांनी १३ जूनपर्यंत 'सीबीआय' कोठडी सुनावली. (Latest Marathi News)

ताब्यात घेतल्यानंतर अनिल रामोड यांच्या कार्यालयासह बाणेर (पुणे) आणि नांदेड येथील घरांवर 'सीबीआय'नेछापे टाकले. या कारवाईत 'सीबीआय'च्या हाती मोठे घबाड लागले आहे. शुक्रवारी रात्री उशिरापर्यंत ही कारवाई सुरू होती. यावेळी रामोड यांच्याकडील तब्बल सहा कोटी रुपयांची रोकड आणि बेहिशेबी मालमत्तेची कागदपत्रे जप्त केली. या कारवाईमुळे महसूल विभागासह राज्यात खळबळ उडाली आहे.

दरम्यान, 'सीबीआय'चे अतिरिक्त अधिक्षक आय. बी. पेंढारी यांनी त्याला न्यायालयात हजर केले. रामोड चौकशीसाठी सहकार्य करत नाहीत. विचारलेल्या प्रश्नांना उडवाउडवीची उत्तरे देतात. त्यामुळे गुन्ह्याच्या अधिक तपासासाठी सरकारी वकील अभय अरीकर यांनी पाच दिवसांची सीबीआय कोठडी देण्याची मागणी केली. न्यायालयाने मान्य करत रामोड यांना तीन दिवसांची कोठडी सुनावली.

अनिल रामोड यांना पालखी महामर्गासाठी भूसंपादनच्या मोबदल्यातील लाच प्रकरणी अटक केली आहे. मोबदला देण्यासाठी त्यांनी रेटच काढल्याचा तक्रारदार अॅड. याकूब साहेबू तडवी यांनी केला आहे. यावेळी त्यांनी रामोडांच्या एक कोटी रुपये मोदबदल्याच्या बदल्यात १० लाख रुपये लाच घेत असल्याचे सांगितले. दरम्यान, रामोड यांच्या पुणे आणि नांदेड येथील घरातून मोठ्या प्रमाणत बेहिशेबी रोकडसह संपत्ती हाती लागली आहे.

(Edited by Sunil Dhumal)