Ajit Pawar Interview : ...तर आर आर पाटील महाराष्ट्राचे मुख्यमंत्री झाले असते; अजित पवारांनी सांगितली आठवण !

Ajit Pawar In Pune : ‘सकाळ माध्यम समूहा’तर्फे आयोजित ‘दिलखुलास दादा’ या प्रकट मुलाखतीच्या आज राष्ट्रवादीचे नेते व विरोधीपक्षनेते अजित पवार यांची मुलाखतीचा कार्यक्रम पार पडला. यामुलाखतीत अजित पवार यांनी विविध प्रश्नांना दिलखुलास उत्तरे दिली. यावेळी राष्ट्रवादीचा मुख्यमंत्री कधी होणार? या प्रश्नाला अजित पवारांनी २००४ सालीच राष्ट्रवादीचा मुख्यमंत्री झाला असता, अशी आठवण सांगितली.

महाराष्ट्रात राष्ट्रवादी काँग्रेस हा काँग्रेस पक्षासोबत बऱ्याच कालावधी सत्ताधारी म्हणून राहिला. पण अजूनही राष्ट्रवादीला मुख्यमंत्रीपदाची संधी मिळालेली नाही, असा प्रश्न अजित पवारांना यावेळी विचारण्यात आले. याबाबत विरोधीपक्ष नेते अजित पवार यांनी मोठा खुलासा केला आहे.

अजित पवार (AJit Pawar) म्हणाले, "२००४ मध्ये राष्ट्रवादीला मुख्यमंत्रीपदाची संधी मिळेल एवढ्या जागांची संख्या जनतेने राष्ट्रवादीला दिली होती. काही निर्णय वरिष्ठ पातळीवर घेतले जातात. पक्षाची शिस्त राहावी, यासाठी वरिष्ठ सांगतील तसं ऐकावं लागतं.

२००४ मध्ये आमची काँग्रेससोबत आघाडीस होती. ७१ जागा आमच्या आल्या होत्या. काँग्रेसच्या लोकांनी मानसिकता केलेली होती की, राष्ट्रवादीला मुख्यमंत्री पद जाईल. मात्र काय घडामोडी घडल्या माहिती नाही. निरोप आला की, आपल्याकडे उपमुख्यमंत्री राहणार. विधिमंडळात आमच्या सदस्यांनी आर आर पाटील हे मुख्यमंत्री म्हणून निवड केली होती. आर आर पाटील मुख्यमंत्री म्हणून दिसले असते. पण नाही आम्हाला संधी मिळाली."