Ajit Pawar : दिवाळीत फक्त हिंदूंकडूनच खरेदी करा, म्हणणाऱ्या संग्राम जगतापांना अजितदादा पाठवणार नोटीस; म्हणाले, 'पक्षाच्या विचारधारेपासून...'

Pune News, 11 Oct : राष्ट्रवादी काँग्रेस पक्षात फूट पडल्यानंतर उपमुख्यमंत्री आणि राष्ट्रवादीचे (अजित पवार गट) सर्वेसर्वा अजित पवार हे महायतीत सामील झाले. युतीतील भाजप आणि शिंदेंच्या शिवसेनेची विचारधारा हिंदुत्ववादी असली तरीही अजितदादांनी मात्र थेट हिंदुत्वाची विचारधारा न स्वीकारता शाहू-फुले-आंबेडकरांच्या पुरोगामी विचारधारेवर पक्षाची वाटचाल सुरू ठेवली.

मात्र, त्यांच्याच राष्ट्रवादीचे एक आमदार संग्राम जगताप मात्र, थेट हिंदुत्ववादी भूमिका घेताना दिसत आहेत. नुकतंच त्यांनी सोलापूर येथे झालेल्या हिंदू आक्रोश मोर्चामध्ये बोलताना, 'यंदाच्या दिवाळीची खरेदी फक्त हिंदूंकडूनच करा, असं आवाहन केलं आहे. त्यांच्या या वक्तव्यावर आता उपमुख्यमंत्री अजित पवार यांनी उघड नाराजी दर्शवली आहे.

जगताप यांचं वक्तव्य पक्षाच्या विचारधारेपासून सुसंगत नसून याबाबत त्यांना कारणे दाखवा नोटीस पाठवणार असल्याचं अजित पवारांनी सांगितलं आहे. पत्रकारांनी संग्राम जगताप यांच्या वक्तव्यासंदर्भात प्रश्न विचारला असता अजित पवार म्हणाले, 'त्यांनी अतिशय चुकीचं विधान केलं आहे. आम्ही त्यांना कारणे दाखवा नोटीस पाठवणार आहोत.

एकदा पक्षाची ध्येय-धोरणे ठरल्यानंतर पक्षाच्या विचारधारेपासून कुठलाही खासदार-आमदार किंवा संबंधित जबाबदार व्यक्ती अशा प्रकारची वक्तव्य करत असतील, तर ती वक्तव्य राष्ट्रवादी काँग्रेस पक्षाला मान्य नाहीत.'

तसंच यावेळी अजितदादांनी जगताप यांना जबाबदारीने बोलण्याचा सल्ला दिला. ते म्हणाले, आता आपल्या वडिलांचं छत्र आपल्यावर राहिलं नाही. त्यामुळे आपण जबाबदारीने वागलं आणि बोललं पाहिजे. हा शिव-शाहू-फुले-आंबेडकरांचा महाराष्ट्र सर्वांना पुढे घेऊन जाणारा आहे, असंही अजित पवार यांनी म्हटलं.

शिवाय यापूर्वी मी संग्राम जगताप यांना समज दिली होती. त्यावेळी मी सुधारणा करेन असं त्यांनी सांगितलं होतं. पण ते काही सुधारणा करताना दिसत नसल्यामुळे त्यांची भूमिका आणि विचार पक्षाला मान्य नाहीत, असं अजितदादांनी यावेळी स्पष्ट केलं.

संग्राम जगताप नेमकं काय म्हणाले?

सोलापूर येथील हिंदू आक्रोश मोर्च्या दरम्यान बोलताना अजित पवारांच्या राष्ट्रवादीचे आमदार संग्राम जगताप म्हणाले, 'येणाऱ्या दिपावली सणाच्या निमित्ताने प्रत्येक नागरिकांनी खरेदी फक्त हिंदू लोकांच्याच दुकानातून करावी. आपल्या दीपावली खरेदीचा नफा केवळ हिंदू लोकांनाच मिळायला हवा.'