Amit Shah on Ajit Doval : ‘त्या’ एका टीपने उघडकीस आणले तब्बल 13 बॉम्बस्फोट! अमित शाहांनी सांगितला अजित डोवाल यांच्या पहिल्या भेटीचा थरारक किस्सा

Pune News :लोकमान्य टिळक यांच्या १०६ व्या पुण्यतिथी निमित्त आयोजित कार्यक्रमात राष्ट्रीय सुरक्षा सल्लागार अजित डोवाल यांना केंद्रीय गृहमंत्री अमित शाह यांच्या हस्ते प्रतिष्ठित 'लोकमान्य टिळक पुरस्कार'प्रदान करण्यात आला. या प्रसंगी बोलताना अमित शाह यांनी अजित डोवाल यांच्यासोबतच्या पहिल्या भेटीचा आठवणीतील एक महत्त्वाचा किस्सा उपस्थितांसमोर सांगितला.

अहमदाबाद बॉम्बस्फोट आणि पहिली भेट

अमित शाह म्हणाले, "मी जेव्हा गुजरातचा गृहमंत्री होतो, तेव्हा माझी आणि अजित डोवाल यांची पहिली ओळख झाली. त्यापूर्वी आमचा कोणताही परिचय नव्हता. गुजरातमध्ये सिरीयल बॉम्बस्फोट झाले होते.

त्यावेळी तत्कालीन मुख्यमंत्री नरेंद्र मोदी यांनी मला बोलावून सांगितले की, गुजरातसह इतर ठिकाणी झालेल्या या बॉम्बस्फोटांची सखोल चौकशी गुजरात पोलिसांनी केली पाहिजे. दोषींचा शोध घेण्यासाठी तुम्ही अजित डोवाल यांना बोलावून आपल्या अधिकाऱ्यांसोबत बैठक घेऊन चर्चा करा."

शाह पुढे म्हणाले, "मला आठवतंय, दुपारच्या वेळी अजित डोवाल माझ्या घरी आले होते. त्यांनी त्यावेळी जी महत्त्वपूर्ण टीप दिली, त्यामुळे केवळ अहमदाबाद बॉम्बस्फोटच नाही, तर देशभरातील तब्बल १३ बॉम्बस्फोटांचे गुन्हे गुजरात पोलिसांनी उघडकीस आणले होते.

२०१४ मधील महत्त्वाची नियुक्ती

२०१४ च्या घटनेचा उल्लेख करताना शाह म्हणाले, २०१४ मध्ये जेव्हा नरेंद्र मोदी पंतप्रधान झाले, तेव्हा त्यांनी सर्वात पहिली नियुक्ती ही मुख्य सचिवांची न करता, अजित डोवाल यांची राष्ट्रीय सुरक्षा सल्लागारपदी नियुक्ती केली होती त्यामुळे पंतप्रधान नरेंद्र मोदी यांच्या कार्यकाळाचा जेव्हा जेव्हा इतिहास लिहिला जाईल, तेव्हा राष्ट्रीय सुरक्षेच्या संदर्भात अजित डोवाल यांच्या महत्त्वपूर्ण योगदानाचा उल्लेख नक्कीच असेल. अस अमित शाह म्हणाले.

शाह यांनी डोवाल यांच्या दीर्घ कारकिर्दीचे कौतुक करताना सांगितले की, १९७२ पासून देशावर आलेल्या प्रत्येक संकटाचे निराकरण करण्यात अजित डोवाल यांचे मोठे योगदान राहिले आहे. त्यांच्या या कार्याचे मूल्यांकन किंवा चित्रांकन करणे अत्यंत कठीण असून शब्दांत सांगणे अशक्य आहे.