पुणे भाजपचे रणशिंग फुंकण्यासाठी अमित शहांचा दौरा ठरला..

पुणे : केंद्रीय गृह आणि सहकार मंत्री अमित शहा (Amit Shah) १८ व १९ डिसेंबरला दोन दिवसांच्या नगर-मुंबई आणि पुणे दौऱ्यावर येणार आहेत. शिर्डी येथे साईबाबांच्या दर्शनानंतर प्रवरानगरला सहकार परिषद व पुण्यात कार्यकर्त्यांच्या मेळाव्याला ते मार्गदर्शन करणार आहेत.पुणे महापालिकेच्या मुख्य इमारतीतील डॉ. बाबासाहेब आंबेडकर यांच्या पुतळ्याचे अनावरण तसेच महापालिकेच्या आवारातील छत्रपती शिवाजी महाराजांच्या स्मारकाचे भूमीपूजन शाह यांच्या हस्ते करण्यात येणार आहे.

सहकार मंत्री झाल्यानंतर शाह यांचा हा पहिलाच महाराष्ट्र दौरा आहे.या दौऱ्यात शाह पुण्यातील वैकुंठभाई मेहता सहकारी व्यवस्थापन संस्थेला भेट देणार आहेत.शाह यांचा दौरा गेल्या महिन्यात ठरला होता. मात्र, काही कारणाने हा दौरा रद्द करण्यात आला.१८ डिसेंबरला शाह शिर्डीला भेट देणार आहेत.साईबाबांचे दर्शन घेऊन ते प्रवरानगरला येणार आहेत.भाजपा नेते राधाकृष्ण विखे-पाटील यांनी आयोजित केलेल्या सहकार परिषदेला ते उपस्थित राहणार आहेत.

१८ डिसेंबरला नगर व मुंबईतील दौरा करून शाह रात्रीच्या मुक्कामाला पुण्यात येणार आहेत.१९ डिसेंबरला शाह यांच्या हस्ते पुणे महापालिकेतील डॉ. बाबासाहेब आंबेडकर यांच्या पुतळ्याचे अनावण तसेच छत्रपती शिवाजी महाराजांच्या स्मारकाचे भूमीपूजन करणार आहेत. कार्यक्रमानंतर गणेश कला क्रिडा केंद्र येथे भाजपा कार्यकर्त्यांच्या मेळाव्यात मार्गदर्शन करणार आहेत.या दौऱ्यात शाह स्वर्गीय बाबासाहेब पुरंदरे यांनी उभारलेल्या शिवसृष्टीला भेट देण्याची शक्यता आहे.पुरंदरे यांच्या पर्वती येथील घरीदेखील शाह भेट देणार असल्याचे सूत्रांनी सांगितले.

Edited By : Umesh Ghongade