Sharad Pawar : पवारांच्या मध्यस्थीमुळे दोन संघटनांमधील 'कुस्ती' बरोबरीत सुटली..; लांडगे आखाड्याबाहेर !

Sharad Pawar : कुस्तीगीर संघटनाच्या वादात महाराष्ट्र केसरी स्पर्धा कोण घेणार, असा वाद रंगला होता. त्यावर राष्ट्रवादी काँग्रेसचे अध्यक्ष, कुस्तीगीर परिषदेचे अध्यक्ष राहिलेल्या शरद पवारांनी तोडगा काढला आहे. त्यामुळे या वादावर आता पडदा पडला आहे. त्यामुळे महाराष्ट्र केसरी स्पर्धा पुण्यात होण्याचा मार्ग मोकळा झाला आहे. ता. 11 ते 15 जानेवारीदरम्यान पुण्यात ही स्पर्धा रंगणार आहे.

राज्यात सत्ताबदल होताच राज्य कुस्तीगीर परिषदेवर वर्चस्व असलेली शरद पवार अध्यक्ष राहिलेल्या कुस्तीगीर परिषदेची कार्यकाकणी बरखास्त करण्यात आली होती. भारतीय कुस्तीगीर संघानं घ्यायला लावलेल्या स्पर्धांचं आयोजनच होत नसल्याचा ठपका ठेवत भारतीय कुस्तीगीर संघानं ही करवाई करत महाराष्ट्र कुस्तीगीर संघाची कार्यकारणीच रद्द केली होती.त्यानंतर या वाद न्यायालयात गेला होता.

बरखास्त केलेली जुनी कुस्तीगीर परिषद आणि भाजप खासदार रामदास तडस यांच्या अध्यक्षतेखाली नियुक्त झालेली नवीन कुस्तीगीर परिषद या दोन्ही गटांनी स्पर्धा भरवण्याचा पवित्रा घेतल्यानं वाद निर्माण झाला होता. परिषदेचे सचिव बाळासाहेब लांडगे यांनी या बरखास्तीला न्यायालयात आव्हान दिलं होतं. मुंबई हायकोर्टाकडून कुस्तीगीर परिषदेचा आदेश रद्दबातल करण्यात आला होता.

जुन्या-नव्या कुस्तीगीर परिषदेच्या अनेक दिवसापासून सुरु असलेल्या या वादावर सर्वसंमतीने तोडगा काढण्यात आला आहे. शरद पवार आणि बृजभुषण सिंग यांच्यातील चांगल्या संबधातून हा तोडगा काढण्यात आला आहे. बाळासाहेब लांडगे यांनी महाराष्ट्र राज्य कुस्तीगीर परिषदेच्या सचिवपदाचा राजीनामा दिला आहे. ज्यानंतर आता रामदास तडस यांच्या अध्यक्षतेखालील नवीन कार्यकारिणी कुस्तीगीर परिषदेचे कामकाज पाहणार आहे. तसंच शरद पवार हे सल्लागार म्हणून या कुस्तीगीर परिषदेला मार्गदर्शन करणार आहेत.