Baramati Election: बारामतीची पोटनिवडणूक होणार हायव्होल्टेज! बिनविरोध म्हणता म्हणता आलेत तब्बल 'इतके' अर्ज

Baramati Election: दिवंगत उपमुख्यमंत्री अजित पवार यांच्या निधनाने रिक्त झालेल्या बारामती विधानसभा पोटनिवडणुकीसाठी आज अर्ज दाखल करण्याचा शेवटचा दिवस होता. शेवटच्या दिवशी अनेक राजकीय घडामोडी या मतदारसंघांमध्ये घडल्याचं पाहायला मिळालं.

सुरुवातीपासूनच ही निवडणूक बिनविरोध व्हावी यासाठी राष्ट्रवादी काँग्रेससह महायुतीच्या नेत्यांनी मोठ्या प्रमाणात प्रयत्न केल्याचं पाहायला मिळालं. मात्र, शेवटपर्यंत काँग्रेस उमेदवार देण्याबाबत ठाम राहिलं. त्यानुसार काँग्रेसने उमेदवार जाहीर केला आणि आज त्या उमेदवाराचा अर्ज देखील दाखल करण्यात आला आहे.

तर दुसरीकडे कोणत्याही परिस्थितीत बारामती विधानसभेची निवडणूक लढायचीच असं चंग बांधलेल्या ओबीसी आंदोलक लक्ष्मण हाकेंनी मात्र आज उमेदवारी अर्ज दाखल केला नाही. राष्ट्रवादी काँग्रेसच्या नेत्यांनी त्यांच्याशी चर्चा केल्यानंतर त्यांनी उमेदवारी अर्ज दाखल न करण्याचा निर्णय घेतला.

असं असलं तरी आज दिवसभरात अनेक स्थानिक कार्यकर्ते आणि नेत्यांनी बारामती विधानसभा मतदारसंघात उमेदवारी अर्ज दाखल केल्याचं पाहायला मिळाले. यामध्ये करुणा मुंडे आणि अभिजीत बिचुकले यांच्यासारख्या नेत्यांचा देखील समावेश होता.

सुरुवातीला अजित पवारांच्या निधनाने निर्माण झालेल्या सहानुभूतीच्या जोरावर ही निवडणूक बिनविरोध होईल असं वाटत असताना काँग्रेसने भूमिका घेतली आणि त्यानंतर आता बारामती पोटनिवडणुकीसाठी मोठ्या प्रमाणात अपक्षांचे अर्ज दाखल झाल्याचं समोर आलं आहे. उमेदवारी अर्ज दाखल करण्याच्या पहिल्याच दिवशी तीन अर्ज या मतदारसंघांमध्ये दाखल झाले होते आणि आता शेवटच्या दिवशी तब्बल 55 उमेदवारांनी 68 अर्ज दाखल केले आहेत.

दाखल झालेल्या अर्जांची माहिती बारामती निवडणूक अधिकारी स्वप्निल रावडे यांनी दिली आहे. त्यामुळे ही निवडणूक बिनविरोध होण्याची जवळपास शक्यता मावळली असल्याचे चित्र सध्याच्या परिस्थितीवरून पाहायला मिळत आहे. वाटाघाटीनंतर काँग्रेसच्या उमेदवारांनी जरी अर्ज माघारी घेतला तरी देखील सुनेत्रा पवार विरुद्ध अपक्ष असा सामना निश्चितच रंगलेला पाहायला मिळण्याची शक्यता आहे.